Հայաստանի Հանրապետության նախկին նախագահ Ռոբերտ Քոչարյանը հերթական հարցազրույցն է տվել lenta.ru կայքին։ Նա կրկին խոսել է քաղաքականություն վերադարձի, վարչապետի ժամանակավոր պաշտոնակատար Նիկոլ Փաշինյանի վերջնական հաղթանակի դեպքում հավանական զարգացումների մասին:Հարկ է նկատել, հարցազրույցների շարքը, որով հիշեցնում է իր մասին Ռոբերտ Քոչարյանը, չհաշված որոշ բացառություններ, տարածվում են հիմնականում ռուսական մեդիա հարթակից։ Հասկանալի է, նախկին նախագահի իր գոյության մասին պարբերական հիշեցումները առաջվա պահանջարկը չեն վայելում քաղաքական-վերլուծական շրջանակներում, այդուհանդերձ Լենտա ռու-ի հարցազրույցից մի քանի շեշտադրում մենք կառանձնացնենք, հասկանալու համար, թե ինչ է փնտրում մարտի մեկի գործով և ապօրինի հարստացման օրենքով անցնող նախկին նախագահը Հայաստանի ներքաղաքական միջավայրում․
Թեմայի շուրջ «Առաջին լրատվական»- ի հետ քննարկմանը մասնակցեցին լրագրող Գայանե Աբրահամյանը, քաղաքագետ Վիգեն Խաչատրյանը և աստվածաբան Վարդան Խաչատրյանը:
«Քոչարյանը երևի թե ինչ-որ հաշվարկներ է արել: Բայց Գեղամյանը ճիշտ էր, երբ տարիներ առաջ ասում էր՝ Ռոբերտ Սեդրակովիչը ճիշտ կանի ամեն ինչ անի, որ իրեն մոռանան: Քոչարյանի շահերից է բխում, որ իրեն մոռանան: Նրա հարցազրույցները պարապ զբաղմունք են, դրանց մեջ լուրջ բան չեմ տեսնում»,- այս կարծիքը հայտնեց Վիգեն Խաչատրյանը:
Վարդան խաչատրյանը հակադարձեց՝ նշելով, որ քաղաքական գործիչը պետք է պարբերաբար հիշեցնի իր մասին, հատկապես եթե հայտնվել է այնպիսի հորձանուտում, ինչպիսին քրեական գործի հարուցումն է. «Քաղաքական գործչի լավագույն պաշտպանությունը ակտիվությունն է»:
Գ. Աբրահամյանի խոսքով՝ Քոչարյանի վերջին հույսը ռուսական դեղին մամուլն է. «Նա հստակ մարտավարություն է վարում՝ տարբեր մանիպուլյացիոն գործիքներով. հարցազրույցում ասվում են բաներ, որոնք իրականությանը չեն համապատասխանում»: Լրագրողի դիտարկմամբ՝ Քոչարյանը կլռեր, եթե նրա դեմ քրեական գործ հարուցված չլիներ, իսկ այս դեպքում նա ուզում է քաղաքական հալածյալի կերպարով հանդես գալ:
«Կան քաղաքական ուժեր, որոնց համար գուցե Ռ. Քոչարյանը հույս է. սրանք նման են Քոչարյանին: Որպեսզի մտնեն քաղաքական դաշտ, նրանց համար նման մի լոկոմոտիվ է պետք, որը, որպես կանոն, կապված է լինում ուժի կամ ֆինանսի հետ»,- ընդգծեց Վիգեն Խաչատրյանը՝ հավելելով, որ այդ ոճի ժամանակը, սակայն, անցել է, և այդ ոճով այլևս հնարավոր չէ քաղաքականություն մտնել, այլ պետք է ժողովրդականություն վայելել: Քաղաքագետը նաև հավելեց, որ Քոչարյանը պետք է գիտակցի, որ հարցականի տակ է ոչ թե իր մեղքը, այլ մեղքի աստիճանը և պետք է լռի: Լռելը բխում է Քոչարյանի շահերից:
Մանրամասն՝ տեսանյութում:
