«Վերջին օրերին տեղի ունեցած կարկտահարությունը 14 գյուղերում դեղձենուն շատ լուրջ վնասներ հասցրեց, որն անհետևանք չի մնա, բայց ընդհանուր առմամբ՝ կարելի է ասել, որ այս տարի պտղի տարի է և ունենք կայուն ծիրանի բերք ու արտահանման ծավալներն էլ քիչ չեն։ Եթե նախորդ տարիների ծիրան գրեթե չկար կամ շատ թանկ էր, ապա այս տարի դրա քանակը բավականին շատ էր ու ներքին շուկան էլ միանգամայն բավարարում է։
Լոլիկի հետ կապված գյուղատնտեսության նախարարությունը հայտարարեց, թե անսահմանափակ քանակությամբ լոլիկ է մթերելու, բայց իրականում տեսնում ենք, որ շուկայում 1 կգ լոլիկի արժեքը 250-300 դրամից չի իջնում, ինչը մտահոգիչ է»,- «Առաջին լրատվական»-ի հետ զրույցում նշեց «Հայկական ագրարագյուղացիական միավորում» ՀԿ նախագահ Հրաչ Բերբերյանը՝ անդրադառնալով այս տարվա մթերումների խնդիրներին։
Այս համատեքստում վերջինս նաև հավելեց․ «Այս տարի նաև մորմազգիների խնդիրը կա․ այս ամռան ամիսների տևական շոգը բավականին վնաս տվեց բերքին՝ և կարտոֆիլին, և այլ բանջարատեսակներին, բայց աքիլլեսյան գարշապարը մորմազգիների ցեցն է և այս խնդիրը գալիս է դեռևս Տիգրան Սարգսյանի կառավարության ժամանակներից։ Պակասել են և լոլիկի, և ձմերուկի, և կարտոֆիլի և այլ կուլտուրաների ցանքատարածությունները, բայց ոչ մի նախարարի հեչ պետքը չի, հետո էլ խոսում են գյուղատնտեսությունը զարգացնելու մասին»։
Հրաչ Բերբերյանն արտահանման ծավալների հետ կապված արժանահավատ չի համարում գյուղնախարարության հրապարակած տվյալները՝ նշելով, որ իրենց ունեցած տեղեկություններն միանգամայն այլ ցուցանիշների մասին են վկայում, այսինքն՝ «արտահանման ծավալները շատ ավելի նվազ են, քան ներկայացվում է պաշտոնական վիճակագրությամբ»։
«Թե ինչու է փորձում գյուղնախարարությունն ուռճացնել թվերը՝ մնում եմ զարմացած․ միգուցե գաղափարախոսությամբ սոցիալիստների հետ գործ ունենք, որոնք փորձում են թվեր նկարել, պլան կատարել, բայց կարծում եմ, որ այսօրվա շուկայական հարաբերություններում սոցիալիստներն ընդհանրապես գործ չունեն, նրանք պետք է իրենց տներում նստած լինեն, ոչ թե նման կարևորագույն ոլորտ ղեկավարեն»,-նկատեց Բերբերյանը։
Վերջինս անդրադարձավ նաև գյուղնախարար Արթուր Խաչատրյանի կողմից իր հասցեին օրերս հնչեցրած արտահայտությանը՝ տեղեկացնելով, որ այդ առիթով իրենց կազմակերպությունը առաջիկայում հայց կներկայացնի դատարան ընդդեմ նախարարի՝ պահանջելով բարոյական, ինչպես նաև կրած ֆինանսական կորուստների փոխհատուցում։
Հիշեցնենք, որ օրերս լրատվամիջոցներից մեկի հետ զրույցում գյուղնախարարն արձագանքելով Հրաչ Բերբերյանի իր հասցեին հնչեցրած արտահայտությունը, թե «Արթուր Խաչատրյանն ամենամեծ թվանկարիչն է», ի պատասխան ասել էր․
«Գյուղատնտեսության նախարարությունը չի կարող զբաղվել «թվանկարչությամբ», որովհետև ինքը այդ թվերը ստանում է ՍԱՊԾ-ից ու հրապարակում: Դա անդաստիարակություն և անշնորհքություն է․ եթե ես նկարչական ձիրք ունենայի, իր կոմիքսը կնկարեի»։
Այս համատեքստում Հրաչ Բերբերյանը հեգնանքով նկատեց՝ «ՍԱՊԾ-ն գյուղատնտեսության նախարարության ենթակայության ներքո գործող կառույց է, ապա էլ ինչի՞ մասին է խոսքը»։
Մանրամասները՝ տեսանյութում։