Արցախի պողոտայում վնասվածք է ստացել «Ռադիոլուր»-ի թղթակից Լիանա Եղիազարյանը
ԵՐԵՎԱՆ, 22 ԱՊՐԻԼԻ, ԱՐՄԵՆՊՐԵՍ: Արցախի պողոտայի և Էրեբունի փողոցի խաչմերուկում Ազգային ժողովի պատգամավոր Նիկոլ Փաշինյանի նախաձեռնած երթի ցրման գործողությունների ընթացքում վնասվածք է ստացել Հանրային ռադիոյի «Ռադիոլուր» լրատվական ծրագրի թղթակից Լիանա Եղիազարյանը։ Նա կարողացել է հասնել «Ռադիոտուն», որտեղ եւ շտապօգնության աշխատակիցները օգնություն են ցուցաբերել՝ խորհուրդ տալով գնալ հիվանդանոց։
«Արմենպրես»-ին հաջողվեց ճշտել, որ Եղիազարյանը հետազոտվում է հիվանդանոցում, փորձում է պարզել՝ արդյոք բեկորներ չեն մնացել վնասված ոտքի ազդրի և սրունքի հատվածներում ոստիկանական հատուկ միջոցների կիրառումից:
Ոստիկանությունը հայտարարել է, որ «ղեկավարվելով «Հավաքների ազատության մասին» ՀՀ օրենքի 33-րդ հոդվածով, ոստիկանությունը իրականացրել է հավաքը ցրելու գործողություն՝ իրավիճակից բխող միջոցներով: Հավաքի կազմակերպիչներ՝ Նիկոլ Փաշինյանը, Արարատ Միրզոյանը, Սասուն Միքայելյանը, հարկադրաբար հեռացվել են հավաքի վայրից»:
Բաժանորդագրվեք մեր ալիքին Telegram-ում