Մատչելիության հղումներ

ԱՄՆ Կոնգրեսն ի վերջո հաստատեց բյուջեի նախագիծը՝ առանց սահմանային պատի համար միջոցների


ԱՄՆ Կոնգրեսի շենքը Վաշինգտոնում, արխիվ
ԱՄՆ Կոնգրեսի շենքը Վաշինգտոնում, արխիվ

Ամիսներ շարունակված թեժ բանավեճերից ու ԱՄՆ պատմության մեջ ամենաերկար «շաթդաունից» հետո՝ երեկ Կոնգրեսը ի վերջո հաստատեց այս տարվա բյուջեի նախագիծը:

Նախագահի՝ այսօր սպասվող ստորագրությունից հետո արդեն կառավարության համար աշխատող 800 հազար ամերիկացիները կարող են հանգիստ շունչ քաշել՝ մասնակի սառեցում ու հարկադիր պարապուրդ չի լինի: Մտահոգվելու հերթը հիմա նախագահ Թրամփինն է, ով այդպես էլ չստացավ իր ցանկացած 5,7 միլիարդ դոլարը Մեքսիկայի հետ սահմանին պատ կառուցելու համար:

Սենատում և Ներկայացուցիչների պալատում ձայների գերակշռող մեծամասնությամբ ընդունված փաստաթուղթը այդ գումարի միայն մեկ քառորդը՝ 1,3 միլիարդն է հատկացրել, այն էլ՝ ոչ թե պատի կառուցման, այլ սահմանի անվտանգությունն ամրապնդելու համար: «Սա ոչ նախագահի պարտությունն է և ոչ էլ դեմոկրատների հաղթանակը, այլ՝ քայլ ճիշտ ուղղությամբ», - քվեարկությունից առաջ հայտարարեց հանրապետական Ջոն Ռութերֆորդը:

«Սա այն օրինագիծը չէ, որ ես կգրեի, ոչ էլ, թերևս մեկը, որ կներկայացնեին մեր ընդդիմադիր ճամբարի գործընկերները: Սակայն, մենք վերջապես գտանք փոխզիջումային տարբերակ, որը Կոնգրեսը պատրաստ է ընդունել, նախագահն էլ, ինչպես արդեն ակնարկել է՝ ստորագրել», - ասաց Ռութերֆորդը:

Սենատում Թրամփի կուսակից հանրապետականների առաջնորդ Միթչ ՄըքՔոնելն արդեն հայտարարել է՝ թեև Կոնգրեսում ընդունված բյուջեի նախագիծը հեռու է Թրամփի պատկերացումներից ու ցանկություններից, նախագահը խոստացել է այն ստորագրել: Դա, սակայն, ամենևին չի նշանակում, թե Սպիտակ տան ղեկավարը հրաժարվել է պատի կառուցման գաղափարից:

«Ես առիթ ունեցա նախագահ Թրամփի հետ խոսելու և կուզեի տեղեկացնել իմ գործընկերներին՝ նա ակնարկեց, որ պատրաստ է ստորագրել բյուջեի այս նախագիծը, միաժամանակ՝ մտադիր է արտակարգ դրություն հայտարարել», - նշեց ՄըքՔոնելը:

Արտակարգ դրությունը փաստացի նշանակում է, որ Սպիտակ տան ղեկավարը կարող է վիճահարույց պատի կառուցման համար անհրաժեշտ միլիարդները վերցնել կառավարության պահուստային ֆոնդերից, որոնք նախատեսված են ռազմական ծախսերի, բնական աղետների կամ դժբախտ պատահարների համար:

Ամերիկյան լրատվամիջոցները նշում են, որ Սպիտակ տունը մի քանի աղբյուր է դիտարկում, որոնցից մեկը կարող է լինել Պուերտո Ռիկոյում և տասնյակ այլ նահանգներում՝ այդ թվում Կալիֆորնիայում և Տեքսասում անցած տարի տեղի ունեցած տարերային աղետների համար հատկացված 13 միլիարդ դոլարը: Թեև տեղեկությունը դեռ պաշտոնապես չի հաստատվել, սակայն Տեքսասից ընտրված օրենսդիրները, այդ թվում՝ Թրամփի կուսակիցները, շտապել են զգուշացնել՝ դա անթույլատրելի սխալ կլինի և լուրջ դժգոհություններ կբորբոքի մեկուկես տարուց սպասվող ընտրությունների շեմին:

Նշվում է, որ նախագահը կարող է պատը կառուցել նաև ռազմական շինարարության համար նախատեսված պահուստային ֆոնդի հաշվին: Այդ դեպքում էլ, սակայն, այլ խնդիր կա՝ Թրամփը պետք է կարողանա հիմնավորել, որ Մեքսիկայի հետ սահմանին պատի կառուցումը բխում է ամերիկյան զինուժի շահերից, քանի որ, ըստ օրենքի, այդ ֆոնդի միջոցները կարող են ծախսվել միայն հօգուտ բանակի: Ընդ որում, արդեն իսկ ակնհայտ է, որ ինչ հիմնավորում էլ ներկայացնի Սպիտակ տունը, գործը հեշտությամբ գլուխ չի գալու:

Դեմոկրատներն արդեն հայտարարել են, որ երկրում արտակարգ դրություն հայտարարելու որևէ հիմք չկա, և նախագահի նման որոշման դեպքում իրենք կդիմեն դատարան: «Արտակարգ դրության իրավիճակ չկա, դա Թրամփի հերթական ստերից մեկն է», - հայտարարեց Ֆլորիդայից ընտրված Դեբբի Վասերման Շուլցը:

«Ես չեմ կարող լուռ նստել, երբ նախագահը սպառնում է արտակարգ դրություն հայտարարել՝ իր անիմաստ նախաձեռնությունը, սահմանային պատը կառուցելու համար: Կոնգրեսը շրջանցող այդ ամոթալի քայլը հիմնված է ստի և մոլորության վրա: Նախագահը պատրաստվում է գողանալ այն միջոցները, որ նախատեսված են մեր խիզախ զինվորների համար, և վատնել դրանք՝ ժխտելով խոստումը, թե իբր Մեքսիկան էր վճարելու դրա համար», - ասաց Շուլցը:

Ուղիղ հեռարձակում

XS
SM
MD
LG