Չի բացառվում, որ Մյունխենում կայանա Մնացականյան-Մամեդյարով հանդիպում
«Երբ լինում է Հայաստանի և Ադրբեջանի ԱԳ նախարարների միջև հանդիպում անցկացնելու համաձայնություն, ապա մենք համակարգված կերպով հայտարարում ենք այդ մասին»,- այս մասին այսօր ՀՀ ԱԳՆ-ում լրագրողների հետ զրույցում ասաց ՀՀ ԱԳՆ խոսնակ Աննա Նաղդալյանը՝ պատասխանելով Դավոսում Փաշինյան-Ալիև հանդիպման կազմակերպմանը վերաբերող հարցին և անդրադառնալով Մյունխենում Մնացականյան-Մամեդյարով հանդիպման հավանականությանը:
Աննա Նաղդալյանը ևս մեկ անգամ շեշտեց, որ հանդիպումը կրում էր ոչ պաշտոնական բնույթ, այն եղել է բաց օրակարգով, կրել է ճանաչողական բնույթ, անցկացվել է առանձնազրույցի ձևով: Նրա փոխանցմամբ՝ Հայաստանի վարչապետի և Ադրբեջանի նախագահի հնարավոր հանդիպման մասին խոսվել է Հայաստանի և Ադրբեջանի ԱԳ նախարարների և ԵԱՀԿ ՄԽ համանախագահների նախորդ հանդիպումների ժամանակ, որոնք հանդիպման այլ մանրամասների հետ միասին՝ հայտարարություններում արձանագրվել են:
«Գիտեք` պետք է հստակ արձանագրենք, որ այս և արտաքին քաղաքական այլ հարցերի շուրջ կա լիակատար համակարգում վարչապետի և ԱԳ նախարարի միջև, և այստեղ հակառակ կերպ չէր կարող լինել»,- ասաց Նաղդալյանը: Խոսելով Մյունխենի անվտանգության համաժողովի կուլիսներում Մնացականյան-Մամեդյարով հանդիպման հավանականության մասին՝ ՀՀ ԱԳՆ խոսնակն ասաց, որ ՀՀ ԱԳ նախարարը մասնակցելու է մյունխենյան անվտանգության համաժողովին:
Ըստ նրա, որքանով իրենք են տեղյակ, իր մասնակցությունը հաստատել է նաև Ադրբեջանի ԱԳ նախարարը:
«Երբ լինում է երկու նախարարների միջև հանդիպում անցկացնելու համաձայնություն, ապա մենք համակարգված կերպով հայտարարում ենք այդ մասին, այսինքն` դա նշանակում է, որ այդ մասին հայտարարվում է նույն ժամին և նույն օրը: Մենք միշտ պահպանում ենք այս սկզբունքը, և եթե լինի այս համաձայնությունը, ապա մենք չենք լինի այս սկզբունքի խախտողը, և համաձայնեցված կերպով հանրությունը տեղյակ կպահվի»,- ասաց ԱԳՆ ներկայացուցիչը:
Աննա Նաղդալյանը մեկնաբանեց նաև այս օրերին Հայաստանում գտնվող ադրբեջանական «Թուրան» գործակալության խմբագիր Շահին Հաջիևի այցը Հայաստան:
Նա տեղեկացրեց, որ վերջինիս կողմից հայտ էր ներկայացվել ՀՀ ԱԳՆ հավատարմագրվելու և համապատասխան լրագրողական գործունեություն ծավալելու Հայաստանում, բոլոր նախանշված ընթացակարգերն անցնելուց հետո, վերջինիս հայտը բավարարվել է, և նա իր լրագրողական խմբով այցելել է ՀՀ, այցը զուտ լրագրողական գործունեության ծավալելու նպատակով էր:
«Այս առումով դա մեզ համար բնական գործընթաց է: Մեր կողմից որևէ խոչընդոտ չի ստեղծվում լրագրողների գործունեությունը որևէ կերպ սահմանափակելու ուղղությամբ»,- ընդգծեց Նաղդալյանը:
Հարցին, թե ինչպիսին է Հայաստանի Հանրապետության արձագանքը Հունաստան-Մակեդոնիա համաձայնագրի վերաբերյալ` Աննա Նաղդալյանը պատասխանեց, որ ուշադրությամբ հետևել են կողմերի միջև բանակցությունների զարգացումներին:
Նրա խոսքով, երկրի անվանման շուրջ Աթենքի և Սկոպիեի միջև ընթացող բանակցությունների արդյունավետ ավարտը կարող է երկու երկրների միջև արդյունավետ համագործակցության ուղիներ բացել, ինչպես նաև վստահության մթնոլորտ ձևավորել առավել լայն տարածաշրջանում:
