Մարինա Խաչատրյան. Արսեն Թորոսյանը խախտել է էթիկայի մի շարք կանոններ
Հանրային հեռուստաընկերությամբ հեռարձակվող «Բաց հարթակ» հաղորդման շրջանակում առողջապահության նախարար Արսեն Թորոսյանը Արցախի հերոս Վիտալի Բալասանյանի մասին հարցին պատասխանելիս ասել է. «Նրա վերջին հայտարարություններն ավելի շատ մասնագիտական առումով կդիտարկեի՝ հոգեբուժության տեսակետից։ Ցավալի է, որ Արցախում այդքան շատ զարգացած չէ հոգեբուժությունը, բայց մենք կաշխատենք այդ ուղղությամբ»։
«Առողջ Հանրություն» ՀԿ նախագահ Մարինա Խաչատրյանն այսօր աԱռողջապահության նախարարության դիմաց հրավիրած ասուլիսում հայտարարեց, Թորոսյանի այդ հայտարարությանը չանդրադառնալ չէր կարող, ընդգծեց, որ Թորոսյանը երբեք պրակտիկ բժիշկ չի եղել ու չէր կարող մասնագիտական եզրակացություն տալ։
«Ստացվում է, որ Արսեն Թորոսյանն իր հայտարարությամբ անուղղակիորեն վիրավորանք է հասցրել Վիտալի Բալասանյանին։ Թորոսյանն այդ հայտարարությունը կատարել է դիտավորյալ, հրապարակայնորեն, նպատակ է հետապնդել նվաստացնել մարդու պատիվն ու արժանապատվությունը, և որ ամենակարևորն է, այդ հայտարարությունը չի համապատասխանում իրականությանը»,-ասաց Խաչատրյանը։
Նա հիշեցրեց, որ նախարարը պարտավոր է հարգել հանրության բարոյական նորմերը, իր գործունեությամբ նպաստել իր զբաղեցրած պաշտոնի և իր ներկայացրած համակարգի նկատմամբ վստահության ու հարգանքի ձևավորմանը, հարգել օրենքն ու ենթարկվել օրենքին։
«Թորոսյանը լինելով ՀՀ առողջապահության նախարար թույլ է տվել այնպիսի արտահայտություն, որով խախտել է բարձրաստիճան պաշտոնատար անձանց էթիկայի կանոնները, բժշկական էթիկայի կանոնները և բարոյագիտության կանոնները»,-ասաց նա։
Խաչատրյանը հիշեցրեց, որ տասը ամիս զորամասում որպես բժիշկ ծառայելուց հետո Թորոսյանն ազատվել է ծառայությունից իր կողմից հրապարակված հիվանդության պատճառով, որի հետևանքով ունեցել է երիկամների որոշակի վնասում։
«Չենք մոռացել, որ երիկամների ախտահարում ունեցող Արսեն Թորոսյանը հրապարակային կերպով ստացել է Գարդասիլ պատվաստանյութ, ինչը հակացուցված է երիկամների վնասման ժամանակ։ Չենք մոռացել, որ դոնորների միջազգային օրվա կապակցությամբ Արսեն Թորոսյանը գնացել և հանձնել է արյուն։ Այսպիսով մենք կարող ենք կասկած հայտնել, որ Թորոսյանն ունի երիկամների վնասում, հետևաբար կարող ենք ենթադրել, որ Արսեն Թորոսյանը բոլորովին էլ այդ հիվանդությամբ չի տառապում և հանդիսանում է սովորական դասալիք»,-նշեց նա։
ՀԿ նախագահը հայտարարեց, քանի որ «դասալիք» պետական պաշտոնյան իրեն թույլ է տվել հատել բոլոր սահմանները, վիրավորել պատերազմ, հաղթած զինվորականին, ապա նման հնարավորություն տվել է քաղաքացիներին։
«Ինձ մոտ առողջության առումով հարց է առաջանում մեկ այլ անձի շուրջ՝ իրեն գերագույն գլխավոր հրամանատար հռչակած, վարչապետի պաշտոնը բռնազավթած, բազմիցս սահմանադրական կարգը տապալած, իր երկրի քաղաքացիներին ոչխար պահող, անգրագետ Պողոս անվանող անձի շուրջ մենք ունենք կասկածներ, ավելի կոնկրետ նրա հոգեկան առողջության շուրջ»,-ասաց Խաչատրյանը։
Նրա խոսքով, ինքը լինելով պրակտիկ բժիշկ, նեորովիրաբույժ, կտա մասնագիտական գնահատական այդ հարցի շուրջ.
«Անձնային խանգարումներին բնորոշ են ակնառու անհամապատասխանությունը անձի դիրքորոշումներում ու վարքում, որը ունենում է հուզական դրսևորումներ, ընկալման և մտածողության խանգարումներ, այլ մարդկանց նկատմամբ վերաբերմունքի փոփոխություն։ Աննորմալ վարքագիծն ունենում է խրոնիկ բնույթ, սա բժշկական գնահատականն է։ Վարքային խանգարումները խանգարում են անձի ադապտացիային տարբեր իրավիճակներում։ Այս խնդիրներն առաջանում են մանկական կամ դեռահասության շրջանում, ավելի ակնառու են դառնում հասուն տարիքում»։