Դուշանբե այցի ժամանակ առաջին բորտի օգտագործումն արդարացված էր։ Այս մասին այսօր՝ հունիսի 7-ին ԱԺ–ում լրագրողների հետ զրույցում համոզմունք հայտնեց առաջին փոխվարչապետ Արարատ Միրզոյանը։
«Կար տեխնիկական խնդիր ամբողջ պատվիրակության համար համաժամանակյա տոմսեր ապահովելու, կար ժամանակային խնդիր, ինչպես նաեւ ներկայացվածության խնդիր՝ ԱՊՀ-ում գործընկերներին հավաստիացնել, որ առաջին փոխվարչապետը կարող է ներկայացնել ԱՊՀ վարչապետերի մակարդակով»,–նշեց նա՝ հավելելով, որ ամեն ինչ կշռադատված է եղել։
Դիտարկմանը, որ նախկինում այդպիսի աղմուկով՝ առաջին բորտով ու մեծ պատվիրակությունով չէին գնում, Միրզոյանը պատասխանեց. «Ձեզ թվում է։ Ես ձեզ վստահեցնում եմ, որ առաջին բորտն այնպիսի նպատակների համար է օգտագործվել ու այնպիսի հաճախականությամբ, որն ընդհանրապես կապ չունի ոչ միայն պետության շահերի, այլ ընդհանրապես քաղաքականության հետ»։
Նա փոխանցմամբ՝ նշված 20 մլն թիվն ուռճացված է եւ խոսքը 14 մլնի մասին է։
Անդրադառնալով հրավիրված լրատվամիջոցների ընտրությանը Դուշանբե այցի լուսաբանման համար, նա հավաստիացրեց, որ շատ այլ լրատվամիջոցներ էլ են հրավիրված եղել, որոշները հրաժարվել են, իսկ բոլոր ԶԼՄ–ներին հրավիրել հնարավոր չի եղել դրանք մեծ թվի պատճառով. «Այսուհետ եւս ապահվելու ենք ԶԼՄ-ների մասնակցությունն այն ֆորամտով, որ ներկա լինեն առնվազն մեկ ԶԼՄ նախկին արտոնյալ ԶԼՄ-ներից եւ առնվազն մեկ ԶԼՄ նախկինում մերժվածներից»,–եզրափակեց նա։