Մարդու իրավունքների եվրոպական դատարանը հրապարակել է իր խորհրդատվական կարծիքը Սահմանադրական դատարանի դիմումի վերաբերյալ, որն առնչվում է Ռոբերտ Քոչարյանի դեմ քրեական գործին: 2019-ին ՍԴ ուղարկված գործի վերաբերյալ դատարանը խորհրդատվական կարծիքի համար դիմել էր ՄԻԵԴ: Եվ ահա, ՄԻԵԴ-ը հրապարակել է իր կարծիքը: Դրա մանրամասներն առաջիկայում անշուշտ կլինեն հանգամանալից իրավական քննարկումների առարկա, բայց ընդհանուր առմամբ, դատելով կարծիքից, հնարավոր է եզրակացնել, որ ՄԻԵԴ-ը ըստ էության չի ասել ոչինչ կամ, ավելի շուտ, ասել է մի բան, որ կարող է մեկնաբանվել տարբեր կերպ, և կողմերը կարող են այն քաշել իրենց վրա ըստ հայեցողության:
Մենք սա իհարկե կանխատեսել էինք դեռ այն ժամանակ, երբ հայտնի դարձավ, որ ՍԴ-ն խորհրդատվական կարծիքի համար դիմել է ՄԻԵԴ: Մենք կանխատեսել էինք, որ ՄԻԵԴ պատասխանն ըստ ամենայնի կլինի այնպիսին, որը թույլ կտա թե՛ Ռոբերտ Քոչարյանի թիմին, թե՛ նրան մեղադրողներին, այսպես ասած, գտնել իրենց համար շահեկանն ու անհրաժեշտը: ՄԻԵԴ-ից այլ բան իհարկե սպասել թերևս պետք էլ չէր:
Մենք նաև նշել էինք, որ Սահմանադրական դատարանի նախագահ Հրայր Թովմասյանը, խորհրդատվական կարծիքի համար դիմելով ՄԻԵԴ, պարզապես փորձում է ժամանակ շահել այն բարդ իրավիճակում, որում հայտնվել է: Իսկ իրավիճակը բարդ է նրանով, որ Թովմասյանը հայտնվել էր Ռոբերտ Քոչարյանի, հեղափոխության, ինչպես նաև Ռոբերտ Քոչարյանի և Սերժ Սարգսյանի արանքում: Գործնականում ՄԻԵԴ դիմելը հնարավորություն տվեց մանևրել ավելի քան տարի: Այդ իմաստով ՄԻԵԴ հրապարակումը նշանակում է, որ այդ տեսանկյունից սպառվեց ՍԴ նախագահի և ՍԴ ժամանակը:
Ինչ կանի ՍԴ-ն այժմ, երբ արդեն կա խորհրդատվական կարծիքը, որն արդեն մանևրի հնարավորություն է տվել կողմերին, ոչ թե Թովմասյանին, քանի որ ՍԴ-ն այլևս պետք է ունենա կոնկրետ դիրքորոշում: Այլ հարց է՝ կհայտնի դա, թե ոչ, բայց խորհրդատվության ժամանակն արդեն սպառված է:
Ի դեպ, ՄԻԵԴ խորհրդատվությունը հնչում է բավականին հետաքրքիր զուգահեռով, երբ կառավարող մեծամասնությունը հրաժարվում է հանրաքվեի միջոցով ՍԴ կազմի հարցը լուծելու արմատական քայլից և Վենետիկի հանձնաժողովի հետ քննարկում է խորհրդարանի միջոցով էվոլյուցիոն լուծումը, որտեղ Հրայր Թովմասյանի հեռանալն այլևս կտրուկ և աներկբա պահանջ չէ: Ինչպես կազդի այդ հանգամանքը Ռոբերտ Քոչարյանի գործի վերաբերյալ ՍԴ դիրքորոշման վրա:
