Ձեր վստահելի աղբյուրը

«Սանիթեքն»  ու քաղաքապետարանը մտել են ինքնանպատակ հակամարտության մեջ։ Լրագրողների հետ հանդիպմանն ասաց Երևանի ավագանու «Լույս» խմբակցության ղեկավար Դավիթ Խաժակյանը։ Նրա խոսքով, ոչ քաղաքապետարանն է քայլ իրականացնում խնդիրը «Սանիթեքի» հետ լուծելու համար, խոսքը չի գնում պարզապես գույքի ձեռքբերման մասին, ոչ էլ «Սանիթեքն» է այսքան ժամանակ ականջալուր լինում հասարակությանը։ Դ. Խաժակյանի խոսքով, երկու կողմերը բռնկվել են վեճի, որի հետևանքով տուժում է քաղաքը, հասարակությունը, հարցին պետք է տրվի քաղաքական լուծում։

«Երևանի քաղաքապետն իր անմիջական գործառույթները հստակ ժամանակահատվածում չի կարողանում իրականացնել, ուստի, մենք, որպես ավագանու անդամներ, այլևս չգիտենք՝ քաղաքապետից ինչ պահանջենք, որովհետև քաղաքապետարանը մեր հասարակությանը միայն մեկ կոչ ունի՝ սպասեք և սպասեք»,- ասաց նա։

Դ. Խաժակյանի խոսքով, ներդրումները, ըստ էության, քաղաքապետ Հայկ Մարությանի պաշտոնավարման ընթացում կանգնել են, այս հարցի պատասխանը պետք է տա և Մարությանը, և «Սանիթեքի» ղեկավարությունը, թե ինչու են դադարել ներդրումները։

«Խնդրի լուժումն այլևս պետք է ոչ թե պատճառների մեջ փնտրել, այլ տալ խնդրին լուծում, որովհետև արձանագրում ենք, որ տաս ամիս անց ունեք դեռևս խոստում և չլուծված համակարգ»,- ասաց «Լույս» խմբակցության ղեկավարը։

Դ. Խաժակյանի խոսքով, այլընտրանք չկար քան «Սանիթեքի» հետ կնքված պայմանագրերից մեկի փոխհամաձայնությամբ լուծարումը և երկրորդ միջազգային օպերատորի ներգրավումը։ Նա նշեց, որ քաղաքապետարանը կարող է հիմա խզել պայմանագիրը «Սանիթեքի» հետ, բայց մեկ բան հասկանալի է, որ քաղաքապետարանում այդ պայմանագրի հիմնադրույթներին չեն տիրապետում. «Դրա վառ վկայությունն է այն հանգամանքը, որ երբ ամիսներ առաջ Հայկ Մարությանը հայտարարեց՝ կամ «Սանիթեքը» պետք է հրաժարվի  սանմաքրում իրականացնելու պարտականությունից կամ  լինեն տույժ- տուգանքներ։ Պայմանագրում սանմաքրումը «Սանիթեքի» պարտավորությունն է, կամ պայմանագիրը պետք է լուծվեր ամբողջությամբ, կամ չէր կարող մեկ բաղադարիչ դրանից հանվել, կհակասեր մեր գնումների օրենսդրությանը»։

Նրա կարծիքով, «Սանիթեքն» իր ունեցած ռեսուրսով ի վիճակի չէ ողջ ծավալը սպասարկել։
Հարցին, թե ստեղծված իրավիճակում մեղավորն ո՞վ է, Դ. Խաժակյանը պատասխանեց. «Կարծում եմ՝ երկու կողմը կրում է  մեղավորությունը, բայց դրա քաղաքական պատասխանատվությունը որպես Հայկ Մարությանի նախընտրական ծրագրի իրականացման երաշխավորի, գլխավորապես պատկանում է Նիկոլ Փաշինյանին»։