Ձեր վստահելի աղբյուրը

«Այսօրվա համատարած բռնությունների ֆոնին հայտարարությամբ է հանդես եկել Միացյալ նահանգների դեսպան Լին Թրեյսին»,-Ֆրանսիայի հրապարակում «Դիմադրության» շարժման հանրահավաքի ժամանակ  ասաց ԱԺ փոխնախագահ Իշխան Սաղաթելյանը:

Նա մեջբերեց ԱՄՆ դեսպանի խոսքերը. «Մենք հանձնառու ենք օգնել հայ ժողովրդին՝ կառուցելու այնպիսի ապագա, որի հիմքում ընդհանուր ժողովրդավարական արժեքներն են ու այն ճանապարհը, որ հայ ժողովուրդն ընտրեց 2018 թվականին եւ մեկ անգամ եւս վերահաստատեց 2021 թ. ընտրությունների ժամանակ»։

Իշխան Սաղաթելյանը խորն ափսոսանք հայտնեց դեսպանի հայտարարության կապակցությամբ։

«2018 թ-ին հայ ժողովուրդը գնաց լավ կյանքի սուտ խոստումների հետևից, ոչ թե Արցախի կորստի ու արյունալի պատերազմի, գնաց ավելի ժողովրդավար պետություն ստեղծելու հետևից, ոչ թե բռնապետություն հաստատելու և ժողովրդավարությունը բռնաբարելու հետևից։ Իսկ ինչ վերաբերում է 2021 թ-ի ընտրություններին, չնայած այդ խայտառակ ընտրություններին՝ դրանց ժամանակ հայ ժողովուրդը Նիկոլին Արցախը զիջելու և առհասարակ երկիրը նոր զիջումների տանելու մանդատ չի տվել։ Եթե որոշ շրջանակներ կարծում են, որ հայ ժողովուրդը դառնալու է իրենց շահերի սպասարկուն, շահերի մանրադրամը՝ խորապես սխալվում են: Հայ ժողովուրդը հիմա այս հրապարակում է հենց դա կանխելու համար: Սա իշխանության համար պայքար չէ՝ սա Հայաստանի ինքնիշխանության համար պայքար է և որևէ մեկը չփորձի ժողովրդավարությունը հակադրել անվտանգության հետ»,-հայտարարեց նա։

Սաղաթելյանն ասաց, որ վերահաստատում է, որ Ռուսաստանը Հայաստանի ռազմավարական դաշնակիցն է, իսկ ԱՄՆ-ը և ԵՄ երկրները նրա կարևոր գործընկերները։

«Ի տարբերություն Նիկոլի՝ մենք Մոսկվայում չենք բամբասում ամերիկացիներից և եվրոպացիներից, իսկ Վաշինգտոնում և Բրյուսելում՝ Մոսկվայից, մենք շատ հստակ ձևակեպել ենք մեր օրակարգը և պատրաստվում ենք լիարժեք համագործակցության»,-ասաց նա և հավելեց «Կրկին դիմեց հարգարժան դեսպանին, միջազգային կազմակերպությունների ներկայացուցիչներին՝ վերջ տվեք երկակի ստանդարտներին, դուք լռել եք երբ օրվա իշխանությունը շրջափակում էր դատարանները, դուք լռում եք տասնյակ քաղբանտարկյալների դեպքում, դուք այսօր լռում եք, երբ ոստիկանությունը ժողովրդի նկատմամբ կիրառում է բռնի և անհամաչափ ուժ, դուք ձեր լռությամբ նպաստում եք, որ Հայաստանում լինի բռնապետություն»,-հայտարարեց ԱԺ փոխխոսնակը։

Նա հայտնեց, որ այդ և այլ թեմաներով պատրաստ են հանդիպել Հայաստանում հավատարմագրված դեսպանների հետ և մանրամասն ներկայացնեն այն պատկերը, որը գոյություն ունի երկրում, իսկ Հայաստան ժամանող  Լիտվայի նախագահին էլ նամակ են ուղարկել և ասել, որ Նիկոլ Փաշինյանը լեգիտիմ չէ և չի ներկայացնում հայ ժողովրդի կամքը և այդ հանդիպումները ծառայեցնելու է իր լեգիտիմությունը ցույց տալու համար:

«Մի շատ հետաքրքիր նորություն ենք ուզում ձեզ հայտնել :Հիշում եք չէ, որ երեկ ասում էինք, թե ոստիկանությունը պարգևավճար է ստացել: Մայիսի 16-ին ոստիկանությունը ստացել է 2 մլրդ 180 մլն դրամ պարգևավճար, մոտ 5 մլն դոլար՝ պաշտոնական թվերով: Մայիսի 11-ին էլ ևս 700 մլն դրամ պարգևավճար է ստացել: Մեկ շաբաթվա մեջ մոտ 3 մլրդ դրամ, շուրջ 6.5 մլն դոլար Նիկոլը ոստիկանությանը պարգևատրել է այս ապօրինությունները գործելու համար»,-հայտարարեց Իշխան Սաղաթելյանը: