ԵՐԵՎԱՆ, 18 հունվարի. /Նովոստի-Արմենիա/.Մոսկվան սպասում է Բաքվի պարզաբանումներին Ադրբեջանի տարածք հայկական ծագմամբ ՌԴ քաղաքացիների մուտքի արգելքի հետ կապված յուրաքանչյուր դեպքի վերաբերյալ:
Այդ մասին նշվում է ուրբաթ ՌԴ ԱԳՆ-ի կողմից տարածված հայտարարությունում, փոխանցում է ՏԱՍՍ–ը:
«Ծանոթացանք Ադրբեջանի ԱԳՆ–ի մամուլի ծառայության արձագանքին հայկական ծագմամբ ՌԴ քաղաքացիներին Ադրբեջան մուտքի արգելքի մասին մեր հայտարարությանը: Նշում ենք դիվանագիտական քաղաքավարության շրջանակներից դուրս եկող մեկնաբանությունների երանգը: Ոչ պակաս տարակուսանք է առաջացնում նաև մեկնաբանության բովանդակությունը, որը ենթադրում է Ադրբեջան այցելող ՌԴ քաղաքացիների խտրականության թեման «չուռճացնելու» պահանջ` որպես իբր պակաս նշանակալի իրադարձություն` երկկողմ հարաբերությունների դինամիկ զարգացման ֆոնին», - նշված է ՌԴ ԱԳՆ-ի կողմից տարածած հաղորդագրությունում:
ՌԴ ԱԳՆ-ն նշել է, որ նման մոտեցումը անթույլատրելի է:
«Գործի հետ ուղղակի կապ չունեցող ընդհանուր ենթադրությունների փոխարեն կցանկանայինք ստանալ առարկայական պարզաբանումներ ՌԴ քաղաքացիների հետ կապված յուրաքանչյուր դեպքի կապակցությամբ», - ընդգծել են գերատեսչությունից:
ՌԴ արտաքին գործերի նախարարությունից նաև նշել են, որ ՌԴ քաղաքացիների մուտքն արգելող դեպքերի շրջանում եղել են այնպիսի դեպքեր, ինչպիսիք են 2018 թ.-ի մայիսին Երկրորդ աշխարհամարտի վետերանի, բլոկադային Լենինգրադի 81-ամյա բնակչի մուտքի արգելքը կամ 2017 թ.-ի փետրվարին մի կնոջ մուտքի արգելքը, ով իր 4 տարեկան երեխայի հետ երկար ժամանակ անցկացրել էր օդանավակայանի հատուկ գոտում:
«Դիվանագիտական խողովակներով ակնկալում ենք պաշտոնական պարզաբանումներ ադրբեջանական կողմի այն ակնարկների մասին, որ ՌԴ քաղաքացիներն Ադրբեջան նախատեսված իրենց այցերը պետք է համաձայնեցնեն Մոսկվայում Ադրբեջանի դեսպանության հետ, ինչը կհամարվեր Ռուսաստանի և Ադրբեջանի քաղաքացիների առանց վիզայի այցելությունների 1997թ.–ի հուլիսի 3–ի համաձայնագրի խախտում», - նշում են ՌԴ ԱԳ նախարարությունից:
Նշվում է նաև, որ ադրբեջանական կողմի բովանկալից արձագանքից կախված` կսահմանվեն հետագա քայլերը:-0-
