Մարտի 31-ին Արցախում համապետական ընտրություններ են՝ ձևավորելու են Ազգային ժողով և ընտրելու են նախագահ: «Առաջին լրատվական»-ը այսօր հյուրընկալել է «Ազգային վերածնունդ» կուսակցության առաջին համար, Արցախի նախագահի թեկնածու Հայկ Խանումյանին:
Ինչպես նշեց մեր զրուցակիցը՝ Արցախում քաղաքական ակտիվությունը սկսվել է դեռևս 2018 թվականի ամռանից. «Եվ որոշ կուսակցություններ, իրենց ոգուն համապատասխան, օգտագործում են փողը և տարբեր ապօրինի լծակներ. այս պահին աննախադեպ գումարներ են ծախսվում Արցախում, այնպիսի գումարներ, որ կարծում եմ Հարավային Կովկասի ոչ մի երկրում չեն ծախսվել ընտրողներին կաշառելու համար: Խոսքը, մասնավորապես, «Ազատ հայրենիք» կուսակցության և Արայիկ Հարությունյանի մասին է, որոնք փորձում են մարդկանց նյութապես շահագրգռելով ձայներ ստանալ»:
Նրա խոսքով՝ Հայաստանի Հանրապետությունը չեզոքություն է դրսևորում, դուրս է եկել խաղից՝ որպես գործոն, և բնականաբար այս գործընթացների վրա ազդեցություն չունի, որովհետև ցանկություն էլ չունի. «Մի խոսքով՝ Հայաստանի Հանրապետության կառավարությունը ընտրություններում արբիտր լինելու դերակատարողից վերածվել է քաղաքացիական հասարակության դերակատարի: Այսինքն՝ կատարելու է միայն դիտորդական առաքելություն, ինչը շատ կարևոր է հատկապես քվեարկության վերահսկման ընթացքում: Սակայն այսօր բաց քվեարկություններին փոխարինել է շատ փողը»:
Հայկ Խանումյանի կարծիքով՝ Երևանում Արցախի ներքաղաքական իրավիճակը հասկանալու խնդիր կա, և այդ խնդիրն ունի ոչ միայն կառավարությունը, այլև քաղաքացիական հասարակությունը, փորձագիտական շրջանակները: Նա ընդգծեց՝ ընտրությունների հավասար պայմաններ չկան. «Մեր դիտարկումներով՝ «Ազատ հայրենիք» կուսակցությունը 500 անգամ ավելի գումար է ծախսելու, քան մենք. այդ գումարները կարող են ազդել ընտրությունների արդյունքների վրա»:
Հարցազրույցն ամբողջությամբ՝ տեսանյութում:
