Ամերիկացի ռեժիսոր Մարտին Սկորսեզեն պատասխանել է հարցին, թե ինչու են իր ֆիլմերի գլխավոր հերոսները սովորաբար տղամարդիկ, հաղորդում է The Hollywood Reporter-ը:
«Սա մի հարց է, որն ինձ տալիս են տարիներ շարունակ: Իսկ մի՞թե ես պարտավոր եմ [գլխավոր դերերում նկարահանել կանանց]»,- ասել է կինոռեժիսորը: Նշվում է, որ նա նեղվել է լրագրողի հարցի պատճառով:
«Եթե պատմությունը դա չի պահանջում, ապա դա պարզապես ժամանակի վատնում է: Եթե պատմությանը պետք է կին գլխավոր կերպար, ապա ինչու՞ ոչ»,- շարունակել է Սկորսեզեն: Միևնույն ժամանակ, նա բացատրել է, որ չգիտես ինչու մարդիկ չեն հիշատակում նրա այն ֆիլմերը, ինչպիսիք են «Կազինոն» կամ «Անմեղության դարաշրջանը», որոնցում մեծ ուշադրություն է դարձվում կանանց:
Ռեժիսորը խոստովանել է, որ կցանկանար կնոջ գլխավոր դերակատարմամբ նախագիծ իրականացնել, բայց խանգարում է ժամանակի սղությունը: «Հիմա 76 տարեկան եմ: Որտեղի՞ց ինձ ժամանակ դրա համար»,- ասել է նա:
Հոկտեմբերի սկզբին Սկորսեզեն կտրուկ արտահայտվել է Marvel ստուդիայի գերհերոսական բլոքբաստերների մասին. «Ես այդպիսի բաներ չեմ դիտում: Ես փորձել եմ, հասկանում եք: Բայց դա կինո չէ: Լուրջ, միակ բանը, որի հետ ես կարող եմ դրանք համեմատել, նկատի ունենալով, թե որքան որակյալ են դրանք պատրաստվում, որքան լավ են խաղում դերասանները բոլոր պայմաններում, զվարճանքի այգիներն են»:
Ավելի ուշ նրան աջակցել է ռեժիսոր Ֆրենսիս Ֆորդ Կոպոլան: Նա Marvel-ի նախագծերը զզվելի է անվանել: