Վենեսուելայի բնակչուհի Քաթրինա Պառան պատմել է, թե ինչպես է մահվան շեմին հայտնվել հակաբեղմնավորիչ հաբերի և հազվագյուտ հիվանդության անհամատեղելիության պատճառով, որի մասին չի իմացել։ Նրա պատմությունը ներկայացրել է Daily Mail պարբերականը։
2012 թվականի Սուրբ Ծննդյան նախօրեին 20-ամյա Պառան սարսափելի թուլություն և փորացավ է զգացել, ինչպես նաև անընդհատ սրտխառնոց։ Նա բժշկի է դիմել։ Նրա մոտ սեպսիս են ախտորոշել և հիվանդանոց են պառկեցրել աղջկան։ Երկու ամիս աղջիկը վերակենդանացման բաժանմունքում է անցկացրել։ Եվ չնայած սեպսիսը կարողացել են բուժել, մնացած ախտանշանները շարունակել են ավելի խորանալ, և բժիշկները չեն հասկացել, թե ինչն է պատճառը։ Ժամանակի ընթացքում աղջիկն ամբողջովին կաթվածահար է եղել։ Նա նույնիսկ չի կարողացել շարժել լեզուն։
«Ես պարզապես ուզում էի մահանալ, որպեսզի այս մղձավանջն ավարտվեր»,– խոստովանել է նա։
Միայն ութ ամիս անց բժիշկներին հաջողվել է պարզել, որ Պառան տառապում է հազվագյուտ հանդիպող գենետիկ հիվանդությամբ. սուր պորֆիրիա։ Հիվանդության խորացմանը նպաստել էին հակաբեղմնավորիչ հաբերը, որոնք աղջիկը նույնիսկ հիվանդանոցում էր շարունակել ընդունել։
Հենց որ նա դադարել է ընդունել հաբերը, աստիճանաբար դեպի լավն է գնացել։ Նա ստիպված է եղել նորից սկսել քայլել և խոսել սովորել։
Այժմ աղջիկը լիակատար առողջ է։ Նա որոշել է լրագրողներին պատմել իր մասին, որպեսզի իրազեկի մարդկանց այդ հիվանդության մասին։ Նրա հիմնական երազանքը բարեգործական հիմնադրամի ստեղծումն է, որը կօգնի այդ հիվանդությամբ տառապող մարդկանց։