Շատերին տարակուսելի թվաց, որ Հայաստանի Սահմանադրության օրը վարչապետ Նիկոլ Փաշինյանը պաշտոնական այցով մեկնեց Վիետնամ։ Ամենևին չենք վիճարկում, որ Վիետնամը նույնպես կարող է որոշակի հետաքրքրություն ներկայացնել Հայաստանի արտաքին քաղաքականության տեսանկյունից, սակայն այցը հանգիստ կարելի էր այնպես կազմակերպել, որ այն չհամընկնի Սահմանադրության օրվա հետ, մանավանդ, որ այս տոնը նոր Հայաստանում ևս շարունակվում է անշուք նշվել։ Փաստորեն՝ հեղափոխությունից հետո նույնպես սահմանադրական մշակույթի նկատմամբ պատշաճ վերաբերմունք չի ցուցաբերվում։ Ավելին՝ այնպիսի տպավորություն է, որ նոր իշխանությունները փորձում են ներմուծել Քաղաքացու օրը, որը, մեծ հաշվով, արհեստական ու հասարակությանը բաժանող տոն է ու դրանով ստվերել Սահմանադրության օրը։ Վերջին հաշվով՝ չի պատշաճում պետության կարևորագույն տոներից մեկի նկատմամբ նման վերաբերմունքը, եթե նույնիսկ երկրի քաղաքական ղեկավարությունը չի ընդունում ՍԴ ներկայիս կազմը։
Մյուս կողմից՝ հենց վիետնամական այցի ժամկետների հետ կապված կան որոշ խնդիրներ։ Թերթերից մեկի տեղեկություններով՝ այս այցը բավականին հապշտապ ու հանպատրաստից է եղել:
Ուշագրավ է, որ դեռևս մայիսի 24-ին նախագահի հրամանագրով հետ է կանչվել Վիետնամում ՀՀ դեսպան Ռաիսա Վարդանյանը, միաժամանակ Վիետնամում ՀՀ նոր դեսպան է նշանակվել Վահրամ Կաժոյանը, որը, սակայն, դեռևս իր հավատարմագրերը չի հանձնել Վիետնամի իշխանություններին:
Այլ խոսքով՝ ստացվում է, որ վարչապետը մեկնում է մի երկիր, որտեղ ՀՀ դեսպանը չի հանձնել իր հավատարմագրերը, այսինքն՝ ՀՀ-ն փաստացի ներկա պահին չունի դիվանագիտական ներկայացուցիչ:
Հարց է առաջանում, թե ինչո՞ւ էր պետք նման հապճեպությունը, մանավանդ, որ կարելի էր սպասել 10-15 օր ու ավելի պատշաճ կազմակերպել այցը։
Փաշինյանի այցի բովանդակությունը նույնպես հագեցած համարել չի կարելի։ Իհարկե, հանդիպումներ են եղել երկրի վարչապետի, խորհրդարանի նախագահի, գործարարների հետ, սակայն այնպիսի տպավորություն է, որ օրակարգում գերակշռել են հումանիտար, մշակութային միջոցառումները։ Այս հարթության վրա նույնպես նախկին ավանդույթները պահպանվում են, երբ պաշտոնական այցերի մի մասը, այսպես ասած, տուրիստական բնույթ էին կրում։
Վարչապետ Փաշինյանը Վիետնամում ընդգծել է, որ աշնանը Երևանում կայանալիք միջկառավարական հանձնաժողովի նիստում ընդունվելու են վիզային ռեժիմի դյուրացման, զբոսաշրջության ոլորտում կապերի զարգացման, կրկնակի հարկումը բացառող համաձայնագրի ստորագրման որոշումներ: «Պայմանավորվել ենք նիստի շրջանակում անցկացնել նաև բիզնես ֆորում, որը կնպաստի առևտրատնտեսական կապերի զարգացմանն ու ընդլայնմանը», – ասել է Փաշինյանը:
Սա, թերևս, այցի միակ առարկայական արդյունքն է, սակայն այս դեպքում էլ չպետք է գերագնահատել սպասելիքները, որովհետև անցած տարի Հայաստանը Վիետնամից ներմուծել է ընդամենը 46 միլիոն դոլարի ապրանք, բայց Վիետնամ Հայաստանից 2018-ին արտահանվել է միայն կես միլիոն դոլարի ապրանք:
Ապրանքաշրջանառության ծավալների մեծացման նախադրյալներ, անկեղծ ասած, տեսանելի չեն։
Ինչևէ, այսօր Փաշինյանի վիետնամական այցն ավարտվում է, իսկ վաղը Նիկոլ Փաշինյանի գլխավորած պատվիրակությունը հանդիպումներ է ունենալու Սինգապուրում։ Հուսանք, որ այս դեպքում օրակարգն ավելի հագեցած կլինի, մանավանդ մեր գրեթե բոլոր վարչապետները դրվատանքով են խոսել զարգացման սինգապուրյան մոդելի մասին։