«Առաջին լրատվական»-ը տեղեկացրել էր, որ ՀՀ նախկին զինդատախազ, նախկին քաղբանտարկյալ, Հայ ազգային կոնգրեսի վարչության անդամ Գագիկ Ջհանգիրյանը դիմել էր Վճռաբեկ դատարան՝ արդարացման պահանջով․ դատարանն էլ բավարարել էր նրա բողոքը, որով նա պահանջել էր բեկանել տարիներ առաջ իր նկատմամբ կայացված մեղադրական դատավճիռը և արդարացնել։
Քանի որ նախկին քաղբանտարկյալների մեծ մասը նախկինում ՀԱԿ անդամներ էին, ՀԱԿ-ն էլ նախաձեռնել է նրանց արդարացման գործընթացը։
ՀԱԿ իրավական հարցերի պատասխանատու Արմեն Խաչատրյանից տեղեկացանք, որ այս պահի դրությամբ նախկին քաղբանտարկյալներ Մուշեղ Սաղաթելյանին, Սմբատ Այվազյանին (հետմահու), Արամ Բարեղամյանին արդարացնելու համար Վճռաբեկ դատարան բողոք ներկայացնելու պահանջով ՀԱԿ-ը դիմել է գլխավոր դատախազին։
Հիշեցնենք, որ հեղափոխությունից հետո Մուշեղ Սաղաթելյանի գործով Մարդու իրավունքների եվրոպական դատարանը վճռել էր, որ տեղի է ունեցել Մարդու իրավունքների եվրոպական կոնվենցիայի 3-րդ հոդվածի (Խոշտանգումների արգելում) նյութաիրավական հայեցակետի խախտում, նույն հոդվածի դատավարական հայեցակետի խախտում, ՄԻԵԿ-ի 5-րդ հոդվածի 1-ին կետի խախտում (Ազատության և անձնական անձեռնմխելիության իրավունք), նույն հոդվածի 3-րդ կետի խախտում, ՄԻԵԿ-ի 6-րդ հոդվածի 1-ին կետի խախտում (Արդար դատաքննության իրավունք)։
Արմեն Խաչատրյանը նշեց, որ բոլոր նախկին քաղբանտարկյալների գործերը վերաբացելու համար բողոք են ներկայացնելու Վճռաբեկ դատարան։
Նկատեցինք, որ, օրինակ, նախկին քաղբանտարկյալ, «Ժողովրդավարական հայրենիք» կուսակցության նախագահ Պետրոս Մակեյանը այդ նախաձեռնությունը գնահատել էր որպես իմիտացիոն գործընթաց, քանի որ այդ նույն դատախազությունը, ողջ համակարգը, բացառությամբ թոշակի գնացած նախկին գլխավոր դատախազ Աղվան Հովսեփյանի և մի քանիսի, դատապարտել է իրենց։
«Ես արձագանքեցի նախաձեռնությանը՝ ասելով, որ թող գլխավոր դատախազության հետ չսկսեն գործընթաց, որովհետև դա
դավադրություն է քաղբանտարկյալների նկատմամբ»,- ասել էր Մակեյանը։
«Եթե հրաժարվեն, ապա չենք դիմի։ Կամ եթե գլխավոր դատախազը որոշի դիմել Վճռաբեկ դատարան Պետրոս Մակեյանին արդարացնելու համար, թող գնա, դիմում գրի, հրաժարվի»,- ասաց ՀԱԿ իրավական հարցերի պատասխանատուն։
Հետաքրքրվեցինք, թե վարչապետ, նախկին քաղբանտարկյալ Նիկոլ Փաշինյա՞նն էլ է դիմել արդարացման պահանջով։
«Ես կարծում եմ, որ 2008թ․ Մարտի 1-ի գործով բոլոր վճիռները եղել են շինծու, և բոլորն էլ պետք է արդարացվեն։ Իսկ Նիկոլ Փաշինյանն այն ժամանակ վարչապետ չէր, մյուսների պես եղել է քաղբանտարկյալ»,- ասաց Արմեն Խաչատրյանը։ Նա տեղյակ չէր՝ Նիկոլ Փաշինյանը պատրաստվո՞ւմ է դիմել Վճռաբեկ դատարան՝ արդարացման պահանջով, թե՞ ոչ։
Նույն հարցն ուղղեցինք նաև ՀՀ վարչապետի խոսնակ Վլադիմիր Կարապետյանին, սակայն նա խոստացավ այդ հարցին պատասխանել ավելի ուշ։
Հարցին, թե արդարացված նախկին քաղբանտարկյալները կարո՞ղ են պահանջել փոխհատուցում, Արմեն Խաչատրյանն արձագանքեց․ «Քրեական դատավարության օրենսգիրքը սահմանում է, որ արդարացված անձն իրավունք ունի ստանալու վնասների փոխհատուցում։ Իսկ վնասները կարող են սահմանվել՝ նյութական վնաս, բարոյական վնաս, բաց թողած եկամուտներ և այլն, և այլն։ Այդ ամենը լինելու է՝ ըստ հայցի»։
Հետաքրքրվեցինք՝ արդարացված Գագիկ Ջհանգիրյանը դիմե՞լ է, որպեսզի ստանա փոխհատուցում։
«Գագիկ Ջհանգիրյանը հայտարարել է, որ ինքը որևէ փոխհատուցում չի ցանկանում ստանալ»,- ասաց ՀԱԿ իրավական հարցերի պատասխանատուն։
