«Մանչեսթեր Յունայթեդի» գլխավոր մարզիչ Ժոզե Մոուրինյոն Հայաստանի ազգային հավաքականի ավագ Հենրիխ Մխիթարյանին վերջին պահին դուրս թողեց Անգլիայի Պրեմիեր լիգայի 23-րդ տուրի «Սթոք Սիթիի» հետ հանդիպման հայտացուցակից: Նշենք, որ խաղից ժամեր առաջ Մխիթարյանը այն ֆուտբոլիստների շարքում էր, որոնք հյուրանոցից պետք է գնային «Օլդ Տրաֆորդ» մարզադաշտ:
Խաղից առաջ հյուրանոցում հավաքվում են այն ֆուտբոլիստները, որոնց Մոուրինյոն ընդգրկում է առաջիկա հանդիպման հայտացուցակում: «Սթոք Սիթիի» հետ հանդիպման նախօրեին Մոուրինյոն հայտարարել է, որ Մխիթարյանն ամենայն հավանականությամբ կմասնակցի առաջիկա հանդիպմանը: Բրիտանացի որոշ փորձագետներ Մխիթարյանին «Սթոք Սիթիի» հետ խաղում տեսնում էին «Յունայթեդի» մեկնարկային կազմում, բայց․․․: «Ես կստեի եթե ասեի, որ Մխիթարյանի հայտացուցակից բացակայելը տակտիկական որոշում է։ Ես ընտրել եմ այն ֆուտբոլիստներին, որոնք ցանկանում են դրսևորվել «Մանչեսթեր Յունայթեդում»։ Ֆուտբոլիստի համար բավական բարդ է խաղալ, երբ նա կասկածներ ունի իր ապագայի վերաբերյալ։ Այս պահին Մխիթարյանին հայտացուցակում չընդգրկելը լավագույն որոշումն է, ոչ միայն նրա, այլև թիմի համար»,- «Սթոք Սիթիի» հետ հանդիպումից առաջ ասել էր Մոուրինյոն:
Ըստ էության Մխիթարյանի տեղափոխության վերաբերյալ երեկ տեղի է ունեցել նշանակալի որոշումը, որը ստիպել է Մոուրինյոյին դուրս թողնել հայ ֆուտբոլիստին հայտացուցակից: Ավելի վաղ տեղեկություն էր տարածվել, որ առաջիկա օրերին «Յունայթեդը» ձեռք կբերի «Արսենալի» չիլիացի հարձակվող Ալեքսիս Սանչեսին։ Նշվում էր, որ «Յունայթեդը» որպես փոխհատուցում «Արսենալին» է տրամադրելու Մխիթարյանին՝ հավելավճարով։ Հունվարի 14-ին Լոնդոնի «Արսենալը» Պրեմիեր լիգայի 23-րդ տուրի շրջանակներում հյուրընկալվել էր «Բորնմութին»: Ալեքսիս Սանչեսը «Արսենալի» հետ չէր մեկնել մրցավայր: Հանդիպումից հետո «Արսենալի» գլխավոր մարզիչ Արսեն Վենգերը հայտարարել էր, որ Սանչեսին հայտացուցակից դուրս է թողել այն պատճառով, որ չիլիացին չի կողմնորոշվել իր ապագայի վերաբերյալ: Վենգերը նշել էր նաև, որ Սանչեսի ծառայություններով հետաքրքրված են «Մանչեսթեր Յունայթեդը» և «Մանչեսթեր Սիթին»: Երեկ հայտնի դարձավ, որ «Մանչեսթեր Սիթին» «Արսենալի» հետ դադարեցրել է բանակցությունները Սանչեսի տեղափոխության վերաբերյալ և 90 տոկոսով չիլիացի ֆուտբոլիստը կհայտնվի «Յունայթեդում»: Մոուրինյոյի և Վենգերի հայտարարությունները Մխիթարյանի և Սանչեսի վերաբերյալ խոսում են այն մասին, որ այս ֆուտբոլիստների տեղափոխությունը ավելի քան հավանական է:
Ու չնայած Մոուրինյոն Մխիթարյանի հաշվով «լղոզված» հայտարարություններ է անում, կարծում ենք պարզ է, որ պորտուգալացի մասնագետը հայ ֆուտբոլիստին հայտացուցակից դուրս է թողել մի պարզ պատճառով՝ նա այլևս Մխիթարյանին չի համարում «Յունայթեդի» ֆուտբոլիստ: Նույնը կարելի է ասել Վենգերի մասին: «Մխիթարյանը մեր խաղացողն է: Նա «Մանչեսթեր Յունայթեդի» խաղացողն է, դրա համար էլ խոսում եմ նրա մասին: Նա շատ լավ խաղացող է: Այս մրցաշրջանը Մխիթարյանը լավ սկսեց, այնուհետև մի փոքր թուլացավ: Նա շատ կարևոր ֆուտբոլիստ է մեզ համար, ով օգնեց մեզ նվաճելու Եվրոպա լիգայի գավաթը: Ցավում եմ, որ ստիպված ենք պաշտպանել Մխիթարյանին: Մենք պետք է նաև թիմը պաշտպանենք: Պետք է համոզվենք Մխիթարյանը մնում է, թե՞ որոշել է լքել մեզ: Տրանսֆերային պատուհանը փակվում է հունվարի 31-ին, բայց լավ կլիներ, որ այն փակվեր վաղը»,- հետխաղային մամուլի ասուլիսի ժամանակ ասել է Մոուրինյոն: Հնարավոր է, որ այս կերպ Մոուրինյոն փորձում է հնչեղություն ստեղծել Սանչեսի ու Մխիթարյանի տեղափոխության շուրջ: Մոուրինյոն փորձում է տպավորություն ստեղծել, որ «Յունայթեդից» հեռանալը Մխիթարյանի որոշումն է: Մոուրինյոն Մխիթարյանի տրանսֆերը ձեռք էր բերել 2016 թվականին: Մոուինյոյի կողմից այնքան էլ կոռեկտ չէր լինի հայտարարել, որ մեկ և կես տարի անց հրաժարվում է հայ ֆուտբոլիստից: Չի բացառվում նաև, որ պորտուգալացին մեղավոր է զգում իրեն Մխիթարյանի առաջ: Հետխաղային ասուլիսում Մոուրինյոյի հայտարարությունը բրիտանացի շատ լրագրողներ որակել են բեմականացված հրաժեշտի խոսք:
Ամեն դեպքում դժվար է պատկերացնել, որ տեղի ունեցածից հետո Մխիթարյանը նորից խաղադաշտ դուրս կգա «Մանչեսթեր Յունայթեդի» մարզաշապիկով: Իսկ թե երբ կտեսնենք Մխիթարյանին խաղադաշտում և որ թիմի մարզաշապիկով այս պահին դժվար է ասել: «Ակնհայտ է, որ ինչ-որ բան կատարվում է Սանչեսի հետ: Դրա ապացույցն այն էր, որ Հենրիխ Մխիթարյանը չխաղաց «Սթոք Սիթիի» դեմ: Հայ ֆուտբոլիստը կազմից հայտացուցակում չէր և Ժոզե Մոուրինյուն ուրախ էր այդ տեղեկությունը տրամադրել մեզ: Հնարավոր է, որ Մոուրինյոն ուզում է Մխիթարյանին պահել նշելով, որ գնահատում է նրան, սակայն կարծում եմ վստահ եմ, որ պորտուգալացի մասնագետը մեծ սիրով կփոխանակի Մխիթարյանին Ալեքսիս Սանչեսի հետ»,- ասել է «Մանչեսթեր Յունայթեդի» նախկին պաշտպան Հարի Նևիլը: Ըստ express.co.uk-ի Սանչեսի համար «Յունայթեդը» «Արսենալին» կվճարի 40 միլիոն գումարած Հենրիխ Մխիթարյանի տրանսֆերը:
