Զորացրված Ռազմիկ Պետրոսյանի շահերի պաշտպանը դեռ Վարչական դատարանի կողմից ծանուցում չի ստացել ՊՆ-ի դեմ հայցը վարույթ ընդունելու մասին, սահմանված ժամկետը դեռ չի լրացել։ Հիշեցնենք, որ զորացրված Ռազմիկ Պետրոսյանը Վարչական դատարան հայցը ներկայացրել էր դեկտեմբերի 5-ին՝ ՊՆ-ից պահանջելով զինգրքույկում համապատասխան գրառում կատարել 2016 թ.-ի ապրիլյան մարտական գործողություններին մասնակցելու մասին։
«Առաջին լրատվական»-ի հետ զրույցում փաստաբան Աշխեն Դաշյանը ընդգծեց, որ իր վստահորդը մինչև դատարան դիմելը վերադասության կարգով բողոքարկել էր պաշտպանության նախարարին՝ խնդրելով իր զինգրքույկում համապատասխան գրառում կատարվի, քանի որ այնտեղ գրառումը կատարվել էր միայն մարտական հերթապահություն իրականացնելու մասով, սակայն վերադասության կարգով մերժում է ստացել։ Փաստաբանի խոսքով՝ կան փաստեր, վկաներ, որոնք ապացուցում են, որ Ռազմիկ Պետրոսյանը մասնակցել է բուն մարտական գործողություններին։
«Մեր գործի հանգամանքներից այն կարևոր փաստարկը նաև նշեմ, որ չնայած վերադաս բողոքի քննության արդյունքում մեզ պատասխանը տրվել է, որ նա իրականացրել է միայն մարտական հերթապահություն, նշեմ, որ մարտական հերթապահությունը ենթադրում 15-օրյա ժամկետ, 15-օրյա ժամկետը լրանալուց հետո սահմանից վերադառնում են զորամաս, մեր դեպքում իմ վստահորդը մարտի 18-ից մինչև ապրիլի մեկը մարտական հերթապահություն է իրականացրել, վերադարձել է զորամաս և ապրիլի մեկի գիշերը տագնապով նորից վերադարձել է սահման, ստորաբաժանումը բարձրացել է մարտական գործողությունների մասնակցելու, և մինչև 2016թ.-ի հունիս ամիսը՝ մինչև զորացրվելը, նա մնացել է այնտեղ։ Այսինքն՝ եթե իրականացրել 15-օրյա մարտական հերթապահություն, ինչպե՞ս կարող էր մինչև հունիսը մնալ այնտեղ և 3 ամիս հսկել ինչպես մարտական հերթապահությունը, այնպես էլ գործողություններին մասնակցելը»,- շեշտեց նա։
Աշխեն Դաշյանը նաև ընդգծեց, որ իր վստահորդը ոչ մի արտոնությունից օգտվելու ցանկություն չունի, պարզապես ցանկանում է, որ իր իրավունքները վերականգնվեն, և խտրական մոտեցում չցուցաբերվի, նա հիմա ՀՀ-ում չի գտնվում, բնակվում է ՌԴ-ում, հայրենիք եկել էր ծառայելու և իր պարտքը պատշաճ կատարել է։
«Նշեմ, որ Ռազմիկ Պետրոսյանի հետ ծառայած երկու զինակիցների զինգրքույկներում, ովքեր պաշտոնատար անձանց երեխաներ են և իրականացրել են նույն գործողությունները, ինչ Ռազմիկ Պետրոսյանը, գրառումները կատարվել են մարտական գործողության մասնակցության վերաբերյալ, սակայն Ռազմիկ Պետրոսյանի զինվորական գրքույկում գրառում չի կատարվել։ Վարչական մարմիններին արգելվում է անհավասար մոտեցում ցուցաբերել միատեսակ փաստական հանգամանքների նկատմամբ, եթե առկա չէ դրանց տարբերակման որևէ հիմք»,- ընդգծեց փաստաբանը։
Մանրամասները՝ տեսանյութում:
