Թուրքիայի զինված ուժերը հունվարի 20-ին ռազմական նոր արշավ են սկսել քրդերի դեմ Սիրիայի հյուսիսում՝ «հակաահաբեկչական» գործողություններ իրականացնելու նպատակով: «Ձիթենու ճյուղ» անվանումը ստացած ռազմական գործողություններն իրականացվում են Սիրիայի հյուսիս-արևելյան Աֆրին շրջանում:
Թուրքագետ Հայկ Գաբրիելյանի կարծիքով՝ Թուրքիան երկակի ստանդարտներ է կիրառում։ «Ասում է՝ մտել է Աֆրին, որ պայքարի ԻՊ-ի և քուրդ ահաբեկիչների դեմ, բայց ԻՊ-ն Աֆրինում չի գործում։ Աֆրին ներխուժելն ակնհայտորեն պայմանավորված է Ռուսաստանի թույլտվությամբ, առանց դրա Թուրքիան չէր համարձակվի։ Ռուսատսանն էլ իր շահերն է հետապնդում՝ փորձելով ահաբեկել ԱՄՆ-ին, մասնավորապես քրդերի շրջանում։ Գիտենք, որ ԱՄՆ-ն աջակցում էր Սիրիայի քրդերին։ Այսպիսով հասկանցում է, որ ԱՄՆ-ի օգնության հետ հույսեր կապել պետք չէ»,- «Առաջին լրատվական»-ի հետ զրույցում ասաց Գաբրիելյանը։
Թուրքագետը նշում է՝ Հայաստանը պետք է դասեր քաղի՝ թե՛ Ռուսաստանի պահվածքի հետ կապված և թե՛ նաև Թուրքիայի. «Տեսնում ենք, որ առանց հարևան երկրի իշխանությունների թույլտվության ներխուժում է այդ տարածք, իրեն իրավունք է վերապահում ընդամենը իրազեկել, որ ներխուժելու է այդ տարածք։ Թուրքիան մոտ ժամանակաշրջանում մտադիր չէ հեռանալ Սիրիայից, հակառակը՝ ուժեղացնում է իր ռազմական ներկայությունը։ Մերձավոր արևելքում իրավիճակի հնարավոր հանդարտեցման դեպքում Ռուսաստանի և Թուրքիայի ուշադրությունը կբևեռվի կովկասյան տարածարջանի վրա»։
Այդ կոնտեքստում՝ առանց հայ-թուրքական արձանագրությունների գարունը դիմավորելու արտգործնախարար Էդվարդ Նալբանդյանի հայտարարությունն ի՞նչ հետևանքներ կարող է ունենալ, հարցին ի պատասխան Հայկ Գաբրիելյանը պատասխանեց. «Այժմ հայ-թուրքական հարաբերությունները Թուրքիայի համար առաջնահերթություն չեն։ Իհարկե մեզ համար ձեռնտու է ունենալ կանխատեսելի Թուրքիա, իսկ Էրդողանի դեպքում մենք գործ ունենք անկանխատեսելի Թուրքիայի հետ։ Բազմիցս կրկնել եմ՝ չեմ կարծում՝ Թուրքիան կարգավորման ուղղությամբ որևէ քայլ ձեռնարկի Սերժ Սարգսյանի վերջնագրին ընդառաջ։ Առջևում Թուրքիային ընտրություններ են սպասվում, և Հայաստանի հետ հարաբերությունների կարգավորման փորձը կհարուցի ազգայնամոլ ընտրազանգվածի դժգոհությունը, իսկ Էրդողանը քաղաքական ինքնասպանության չի գնա»։
Հարցազրույցն ամբողջությամբ՝ տեսանյութում։