ԱՄՆ-ը պատժամիջոցները խստացնելու գործողություններ է սկսել Իրանի և Ռուսաստանի ուղղությամբ: Սա նոր մարտահրավեր է նաև Հայաստանի համար: Թեմայի շուրջ «Առաջին լրատվական»- ի հետ զրույցում միջազգայնագետ Սուրեն Սարգսյանը նշեց, որ նման նախաձեռնությունը սպասելի էր: Նրա խոսքով՝ Վաշինգտոնն արդեն այլ աչքով է նայում Ռուսաստանին. «Նոր նախագծում Ռուսաստանը համարվում է տեռորիզմին սպասարկող երկիր, ՌԴ վերաբերյալ նման ձևակերպում նախկինում չի եղել, և հատկանշական է, որ այդ մասին ոչ թե հայտարարություն է հրապարակվում, այլ օրենք»:
Միջազգայնագետի դիտարկմամբ՝ պատժամիջոցներ կիրառելը լուրջ պրոցես է, բայց Թրամփը միշտ պատուհան է բաց թողնում:
«ԱՄՆ-ը նաև իր գործընկեր երկրներին է կոչ անում չշրջանցել ԱՄՆ պատժամիջոցները և առևտուր չանել իր կողմից պատժամիջոցների ենթարկվող երկրների հետ… Պետք է փաստենք նաև, որ Հայաստանը Ռուսաստանի հետ հազարավոր թելերով է կապված, և երբ որ Ռուսաստանում տեղի ունենան տնտեսական վայրիվերումներ, կոլապսներ, տատանվի ռուբլու արժեքը կամ նավթի գինը, դա անպայման անդրադառնալու է Հայասատանի տնտեսության վրա: Եվ երկրորդ, եթե Ռուսաստանը արդեն որակվում է որպես տեռորիզմին աջակցող պետություն, սա նշանակում է, որ Ռուսաստանն ավելի վտանգավոր երկիր է համարվում ԱՄՆ-ի համար, և դա ազդելու է նաև բոլոր այն պետությունների վրա, ովքեր խոր հարաբերություններ ունեն Ռուսաստանի հետ: Ոչ ոք չգիտի, թե պատժամիջոցների խորությունը մինչև ուր կարող է հասնել, պատժամիջոցների գործիքակազմն այլևս արդեն Թրամփի ձեռքում չէ, դա Օրենսդիրի ձեռքում է և օրենքի ուժով պաշտպանված»,- նշեց Ս. Սարգսյանը:
Անդրադառնալով Իրանի նկատմամբ պատժամիջոցներին, որոնց մի մասը գործում է, մյուս մասը նոյեմբերին է ուժի մեջ մտնելու՝ միջազգայնագետն ընդգծեց, որ Իրանի նկատմամբ պատժամիջոցների երկրորդ ալիքը կարող է հարվածել նաև Հայաստանի տնտեսությանը:
Մանրամասն՝ տեսանյութում: