Ամանորյա տոներից հետո տրանսֆերային գործընթացում ակտիվություն են ցուցաբերում նաև հայկական ակումբները: Մասնավորապես, Երևանի «Արարատում» փորձաշրջան են անցնում միանգամից 17 լեգեոներներ: «Թիմին միացել են 17 լեգիոներ, որոնք փորձաշրջան են անցնում: Արդեն հայտարարել ենք Մատվեյ Գույգանովի հետ պայմանագիր կնքելու մասին: Ունենք փորձաշրջան անցնող ֆուտբոլիստներ, որոնք խաղացել են Բելառուսի հավաքականում, կա նաև հարձակվող, որը Իսպանիայից է և հանդես է եկել Լիտվայի առաջնությունում` Բրունո Լամաչևսկին: Թիմի հետ է մարզվում նաև բելառուսական ԲԱՏԷ-ում հանդես եկած խաղացող, որն Ուկրաինայից է` Անդրեյ Յակովլևը:
Այս օրերին ևս երեք ֆուտբոլիստ կմիանա ակումբին` Ստեֆա Իլյիչը, Ալեքսեյ Սալոսինը և Կոնան Քրիստը: Թիմի հետ փորձաշրջան են անցնում նաև Դավիթ Խուրսիձեն, Վալերի Յարոշենկոն, Ալեքսանդր Կոզլովը, Իրակլի Լոգուան, Իվան Սպիչկան, Սերգեյ Ռևյակինը, Անդրեյ Չուխլեյը, Լազար Դժոկիչը, Պավել Պլասկունին, Արտյոմ Կուլյեժան և Ժունիորը»,- նշել էր երևանյան ակումբի սպորտային տնօրեն Տիգրան Ղարաբաղցյանը: Հայաստանի Բարձրագույն խմբի առաջնության առաջին շրջանից հետո «Արարատը» մրցաշարային աղյուսակի նախավերջին հորիզոնականում է: Ակումբի ղեկավարությունը սակայն մտադիր է ուժեղացնել թիմի կազմը և գալիք մրցաշրջանում պայքարել տիտղոսների համար: Արդեն իսկ կարելի է ասել, որ ձմեռային տրանսֆերային պատուհանի ընթացքում հայկական թիմերից դոմինանտը հենց «Արարատն» է: Տրանսֆերային շուկայում ակտիվ են նաև «Փյունիկը», «Բանանցը», «Արարատ-Արմենիան»: Չի բացավում սակայն, որ առաջիկա օրերին ակտիվություն ցուցաբերեն լուրջ հավակնություններ ունեցող մյուս թիմերը՝ մասնավորապես «Շիրակը», «Ալաշկերտն» ու «Լոռին»: Վանաձորի թիմը վերջերս պայմանագիր էր կնքել Հայաստանի ազգային հավաքականի նախկին գլխավոր մարզիչ Արթուր Պետրոսյանի հետ: Վերջինիս որպես գլխավոր մարզիչ մուտքը Բարձրագույն խումբ կարելի է համարել առաջնության ձմեռային դադարի գլխավոր իրադարձությունը:
Պետրոսյանը հայտարարել էր, որ նախատեսված հավաքների ընթացքում թիմը կունենա լուրջ համալրումներ: Նշենք, որ այս օրերին մեր թիմերի մեծ մասը հիմնականում տրանսֆերներ իրականացնում են Բարձրագույն խմբի շրջանակներում: Այսինքն ֆուտբոլիստները հայկական մեկ թիմից տեղափոխվում են մեկ այլ թիմ: Օրինակ «Արարատ-Արմենիայի» դարպասապահ Արսեն Սիուկաևը պայմանագիր կնքեց «Լոռիի» հետ: «Արարատ-Արմենիայի» մեկ այլ ֆուտբոլիստ եզրային պաշտպան Ռոբերտ Դարբինյանն էլ տեղափոխվեց «Բանանց»: «Շիրակի» կոտ դ’իվուարցի հարձակվող Ժան-Ժակ Բուգուին էլ երեկ դարձավ «Արարատ-Արմենիայի» ֆուտբոլիստ: Այսպես կոչված ներքին տրանսֆերները կարելի է շարունակ թվարկել: Ինչ խոսք ուրախալի է, որ մեր ակումբները հստակ քայլեր են կատարում խաղի որակը բարձրացնելու համար: Ցավալի է սակայն մեկ այլ երևույթ: Կրկին անգամ Հայաստանի Բարձրագույն խմբի առաջնությունում խաղացող տեղացի ֆուտբոլիստները շարունակում են մնալ կարգով ավելի բարձր թիմերի ուշադրությունից դուրս: Այս պահին ավելի ուժեղ ակումբում հայտնվելու ամենաիրական հավակնորդը թերևս «Փյունիկի» և Հայաստանի ազգային հավաքականի կիսապաշտպան Պետրոս Ավետիսյանն է:
Վերջինս Բարձրագույն խմբից հնարավոր հեռանալու մասին «Ֆուտբոլ+»-ին տված հարցազրույցում ասել էր «Փյունիկի» գլխավոր մարզիչ Անդրեյ Տալալաևը: «Արտասահմանյան թիմերից անչափ լուրջ առաջարկներ կան Պետրոս Ավետիսյանի և դարպասապահ Անդրիա Դրագոևիչի համար: Եթե նրան գնան, մենք իհարկե պետք է ամրապնդենք նաև նրանց խաղային դիրքերը: Իսկ այնպես, մեր մնացած ֆուտբոլիստները բացարձակ մրցունակ են»,- նշել էր Տալալաևը: Նախորդ տարի ձմեռային տրանսֆերային պատուհանի ընթացքում Ավետիսյանը փորձաշրջան էր անցել Ուկրաինայի բարձրագույն լիգան ներկայացնող երկու թիմերում, սակայն գործարքն այդպես էլ չէր կայացրել: Հուսանք, որ առաջիկա օրերին Ավետիսյանն այնուամենայնիվ կտեղափոխվի ավելի ուժեղ թիմը, ինչը նրա կարիերայի համար կլինի քայլ առաջ: Բարձրակարգ թիմում հայտնվելու իրական հնարավորություն ունի նաև «Փյունիկի» մեկ այլ կիսապաշտպան Էրիկ Վարդանյանը: Վերջինս անցյալ տարի փորձաշրջան էր անցել Իսպանիայում, Շվեյցարիայում սակայն գործարքը ևս չէր կայացրել: Վարդանյանը Հայաստանում հանդես եկող ամենահեռանկարային ֆուտբոլիստների շարքում է, և ցանկալի կլիներ որ նա ևս հնարավորինս շուտ հայտնվեր ավելի բարձր հարթությունում:
Այս պահին սակայն, Վարդանյանի այլ թիմ տեղափոխվելու վերաբերյալ տեղեկություններ չկան: Երևանի «Փյունիկը» այն թիմն է, որտեղ անհամեմատ ավելի շատ են տեղացի երիտասարդ և հեռանկարային ֆուտբոլիստները: Բացի Վարդանյանից ու Ավետիսյանից այս թիմում են խաղում նաև Արթուր Քարտաշյանը, Վահագն Հայրապետյանը, Արմեն Մանուչարյանը, որոնց հետ հույսեր ենք կապում: