Կառավարությունը ստացել է Սահամանադրական դատարանի դատավոր Վահե Գրիգորյանի նամակը և այս պահին ուսումնասիրվում է այն։ Այս մասին «Առաջին լրատվական»-ի հետ զրույցում ասաց վարչապետ Նիկոլ Փաշինյանի խոսնակ Վլադիմիր Կարապետյանը։
Հիշեցնենք, որ երեկ գրել էինք, որ «Առաջին լրատվական»-ի տեղեկություններով՝ հունիսի 26-ին, ՍԴ դատավոր Վահե Գրիգորյանը նամակով դիմել է ՍԴ անդամներին և Հայաստանի Հանրապետության սահմանադրական մարմիններին՝ ՀՀ Ազգային ժողովին, ՀՀ նախագահին, ՀՀ կառավարությանը, Դատավորների ընդհանուր ժողովին՝ Սահմանադրական դատարանում ճգնաժամի հետ կապված:
Նամակը թեև գաղտնի չէ, սակայն այն չի հրապարակվում: Մեր տեղեկություններով՝ Սահմանադրական դատարանի անդամների շրջանում խուճապի հասնող տրամադրություններ կան. երեկ նրանք աշխատանքային ժամից հետո մնացել են մինչև ուշ երեկո՝ քննարկելու համար վերոնշյալ նամակը: