Հանուն Հանրապետության քաղաքական նախաձեռնության պատվիրակությանն այսօր հյուրընկալել էր Արցախի հանրապետության նախագահ Արայիկ Հարությունյանը։
Նախագահի ջերմ ողջույնի խոսքից հետո նախաձեռնության անդամ, ԱԺ պատգամավոր Արման Բաբաջանյանը բացման խոսքից առաջ նախ շնորհավորեց Արայիկ Հարությունյանին Արցախի նախագահի պաշտոնում ընտրվելու կապակցությամբ։ «Արցախում համապետական երկու ընտրությունների և դրանց հետևած իշխանությունների կազմավորման արդյունքում Արցախում տեղի ունեցած քաղաքական ուժերի համերաշխության և համախմբման կարևորագույն գործընթացը, ոգևորում է Հայաստանի առողջ քաղաքական միավորներին և առավել ամրապնդում Արցախի անվտանգությունը: Կարծում եմ, որ իսկապես ընտրություններից հետո ստեղծվել են բոլոր նախադրյալները, որպեսզի Հայաստանի Հանրապետության և Արցախի Հանրապետության կառավարությունները, իշխանությունները ռազմավարական, երկարաժամկետ ծրագրերի իրագործման փուլ անցնեն: Ցավոք անցյալ տարիներին բավարար ուշադրություն չի դարձվել Հայաստանի և Արցախի տնտեսությունների սինխրոնիզացմանը։ Հույս ունեմ, որ Ձեր պաշտոնավարումից ի վեր հենց այս ուղղությունը, Հայաստանի և Արցախի տնտեսությունների միասնականացումը կդառնա կարևոր առաջնահերթություններից մեկը՝ դա դիտարկելով ոչ միայն և գուցե ոչ այնքան տնտեսական, որքան քաղաքական ուղերձ համայն աշխարհին, ի վկայումն Արցախը Հայաստան է կարգախոսի իրական կենսագործման։ Կողմնակից լինելով ադրբեջանա-ղարաբաղյան հակամարտության բացառապես խաղաղ ճանապարհով կարգավորմանը՝ մենք միևնույն ժամանակ հարկադրված ենք ամեն օր պատրաստ լինել պատերազմի: Լինելով մեկ միասնական հայրենիքի և նույն անվտանգային համակարգի անբաժանելի մասերը՝ Արցախի և Հայաստանի Հանրապետությունները լիովին կիսում են խաղաղության հասնելու և պատերազմի պատրաստվելու մոտեցումներն ու ջանքերը: Դա ենթադրում է միասնական ջանքերով և՛ ռազմական ներուժի շարունակական բարելավում, և՛ սոցիալ-տնտեսական կարողությունների զարգացում, և՛ արտաքին քաղաքական լայն գործիքակազմի կիրառում հայ ժողովրդի իրավունքների ու շահերի պատշաճ պաշտպանության նպատակով, և՛, ինչու՞ չէ, տեղեկատվական կամ հոգեբանական անվտանգության պատշաճ երաշխավորում»։
Իր պատասխան խոսքում Արայիկ Հարությունյանը ասաց․ Հայաստանը, Արցախը այսօր ապրում են աննախադեպ անվտանգային մարտահրավերների պայմաններում, ինչը պայմանավորված է առաջին հերթին կորոնավիրուսի հարուցած անորոշություններով, իսկ անորոշությունն ինքնին գլխավոր անվտանգային սպառնալիքն է ամենուր: Հայաստանն ու Արցախւ խնդիր ունեն շարունակաբար բարելավել իրենց ռազմավարական դիմադրողականությունն ու ազդեցությունը առկա և գալիք անվտանգային միջավայրերում, որպեսզի կարողանան արդյունավետորեն դիմագրավել բազմոլորտ, բազմաշերտ, բազմապիսի և բազմաժամկետ մարտահրավերները:
Վերջում Արցախի նախագահը և Հանուն հանրապետության քաղաքական նախաձեռնության անդամները շարունակեցին հանդիպումը փակ ձևաչափով։
https://www.facebook.com/babajanyana/posts/3406004086096961?__xts__[0]=68.ARAyzaAE8BjjNhGVuX4M8TP6K07Z-CPlRCxUdlo-PjAJ_CXuyGgIMYDh7CoO6Yhisfuv7M-bEbIJmgLUGVbX-YOdZim_VK7Push6JZNLZ3qV9KIdeOceAlXBNs8Y9qbGJ5kvoOr_5AgxOInsJAan6P6WZG99nTi0yvzxTvQfudYDsJaLwa-BcgifRGXRlB–zoqMarJ20dnFOk_22NWPmm4xqs2EPzmljO7e6mzWJbx7s_bq8oJVLTJHlKCDjAMJlAhu9VwdIO9Le8J2MiopQ9rS18tnVbKkMgVCLLVsNUQBRX_V4nMw1exnnWsltyjwWx4f_DMXvTCjEp5SyMJK807s0tvw&__tn__=-R
