Բրազիլիայի դեսպանությունը ներկայացնում է դաշնակահար Հայկ Մելիքյանի նոր սկավառակը
Այսօր ժամը 19:30-ին, Կոմիտաս թանգարան-ինստիտուտի համերգասրահում տեղի կունենա դաշնակահար, ՀՀ վաստակավոր արտիստ Հայկ Մելիքյանի մենահամերգը և «Interpreted Figuration» անունը կրող ձայնասկավառակի շնորհանդեսը, որը թողարկել է Հայաստանում Բրազիլիայի դեսպանությունը՝ «Embassy CD Series» նախագծի շրջանակներում:
Բրազիլիայի դեսպանատան մամուլի ծառայությունից հայտնում են, որ «Interpreted Figuration» սկավառակը նախագծում թվով հինգերորդն է: «Embassy CD Series» շարքը Հայաստանում ներկայացնում են դիվանագիտական ներկայացուցչությունները: Շարքը հասցրել է թողարկել լեհական, շվեյցարական, գերմանական, լիտվական երաժշտության ձայնասկավառակներ:
«Ուրախությամբ կարող ենք նշել, որ արդեն ունենք «Embassy CD Series» նախագծի թվով հինգերորդ սկավառակը, որը նվիրված է 20-րդ դարի և ժամանակակից բրազիլական դաշնամուրային երաժշտությանը և ցանկանում եմ իմ խորին շնորհակալությունը հայտնել ՀՀ-ում Բրազիլիայի դեսպան՝ պարոն Էդսոն Մարինյո Դուարտե Մոնտեիրոյին՝ իր պրոֆեսիոնալ աջակցության և երաժշտության հանդեպ իր բարձր նրբանկատության համար: «Embassy CD Series» և «1900+» նախագծերը լայն ճանաչում են գտել հայ հանդիսատեսի և ունկնդրի առջև, քանի որ վերջիններս նպատակ ունեն ներկայացնելու Հայաստանում տարբեր ազգերի դաշնամուրային երաժշտությունը, որոնցից շատերը, ի դեպ, Հայաստանում հնչում են առաջին անգամ, ինչպես նաև կոմպոզիտորական այդքան տարբեր դպրոցները»,- պատմել է Դաշնակահարի մենեջեր Ալեքսանդր Հակոբյանը:
«Interpreted Figuration» սկավառակը ներառում է բրազիլացի 20-րդ դարի և ժամանակակից խոշորագույն կոմպոզիտորների ստեղծագործություններ, որոնց թվում են Հեյտոր Վիլա-Լոբոսի, Էնրիկե Օսվալդի, Ռադամես Գնատտալիի, Օսվալդո Լասերդայի պիեսները, Էռնստ Մալեի և Կամարգո Գվարնիերիի Պոնտեյոները, ինչպես նաև Էդսոն Զամպրոնիայի «Interpreted Figuration» պիեսը: Սկավառակի ներածական երաժշտագիտական խոսքի հեղինակն է արվեստի վաստակավոր գործիչ, արվեստագիտության դոկտոր Կարինե Ջաղացպանյանը:
Աղբյուրը նշում է, որ համերգից հետո, հուլիսի 18-ին սպասվում է Հայկ Մելիքյանի մենահամերգը Իտալիայի Սան Լեո քաղաքում կայանալիք «San Leo International Classical Music Festival»-ի շրջանակներում, որտեղ հանրահռչակ Դաշնակահարը կներկայացնի Հայաստանը:
Լրահոս
Տեսանյութեր
Արդյո՞ք սա սահմանազատում է, թե՞ ճնշման տակ ինչ-որ բան տալ. Սերժ Սարգսյան
