Կա ընկալում, որ ներկայումս խորհրդարանի արտահերթ ընտրության հարցը Նիկոլ Փաշինյանի և նրա գլխավորած քաղաքական ուժի, այսպես ասած, վերարտադրության, բացարձակ իշխանության հաստատման կամ համանման մի հարց է, և հապճեպությունը պայմանավորված է դրանով: Ըստ այդմ՝ կա նաև տեսակետ կամ ընկալում, որ եթե չլինի հապճեպություն, ապա ավելի, այսպես ասած, սթափ ու ողջախոհ ժամկետում մենք կունենանք խորհրդարանի բավականին որակյալ ընտրության գործընթաց: Ընդ որում, առերևույթ թվում է, որ այդ ընկալումները խիստ իրատեսական են, մինչդեռ խորքային առումով դրանք կա՛մ կտրված են իրականությունից ու դրանում եղած բուն խնդրից, կա՛մ կտրված չեն և հենց այդ խնդրի մաս են: Փորձենք հասկանալ՝ ինչի մասին է խոսքը:
«Առաջին լրատվական»- ի հետ թեմայի շուրջ քննարկմանը մասնակցեցին ԳԽ նախկին պատգամավոր Ազատ Արշակյանը, «Մոդուս Վիվենդի» վերլուծական կենտրոնի ղեկավար Արա Պապյանը, քաղաքագետ Հովհաննես Իգիթյանը:
«Մեկուկես ամսվա ընթացքում ինչ-որ բան է փոխվել: Հակահեղափոխական ուժերը փորձում են բոլոր միջոցներն օգտագերծել՝ թույլ չտալու, որ տեղի ունենան արտահերթ ընտրությունները, որովհետև վստահ են, որ եթե արդար, թափանցիկ ընտրություններ լինեն, իրենք չեն վերարտադրվի»,- նշեց Ա. Պապյանը:
«Ժամանակավոր իշխանությունը մեր երկրի համար վտանգավոր է, պետք է լինի իսկական, օրինական, հետհեղափոխական իշխանություն»,- ընդգծեց Ա. Արշակյանը՝ հավելելով, որ ամեն ինչ հեղափոխության տրամաբանության հունով է ընթանում:
Հ. Իգիթյանի դիտարկմամբ՝ խարդախությամբ ընտրված Ազգային ժողովը չի կարող լուծել առկա խնդիրները. «Այս խորհրդարանը ամեն օր հաստատում է, որ ինքն ունակ չէ իրականացնել ոչ միայն ժողովրդի պահանջը, այլ նաև սահմանադրությամբ իրեն տրված լիազորությունը:
Խարդախությունը բացվեց, բայց նորից փորձում են ներկայացնել, թե մեծամասնություն են կազմում»:
Ա. Արշակյանի կարծիքով կանոնակարգ օրենքում փոփոխությունն անելով՝ օրենքն ընդունողներին թովում է, թե այդ թղթիկով իրենք կուժեղանան:
«Ուժը այս պահին Նիկոլ Փաշինյանի ձեռքում է, ինչպես նա մեկնաբանի, այնպես էլ կլինի, Սահմանադրական դատարանը ճնշումների ենթակա է, կընդունի այն տարբերակը, որը թույլ կտա, որ Փաշինյանը մնա վարչապետ և ձևավորի նոր ԱԺ»,- նշեց Արշակյանը:
Անդրադառնալով դիտարկմանը, որ ռիսկային է վարչապետի այն հայտարարությունը, թե ինքը հրաժարական կտա, և ԱԺ-ն կլուծարվի՝ Արա Պապյանը նշեց, որ ինքը ևս շատ ռիսկային է համարում Նիկոլ Փաշինյանի հրաժարականը տալը, որովհետև կարող են ասել մի բան, անել այլ բան՝ վարչապետ ընտրել մեկ ուրիշի:
Ա. Պապյանի դիտարկմամբ՝ Ն. Փաշինյանը չպետք է հրաժարական տա, այլ պետք է լինի հանրաքվե:
Մանրամասն՝ տեսանյութում