«Այսօր բոլոր գոչում են, որ բժշկական տուրիզմն է պետք մեզ մոտ զարգացնել, սակայն գործնականում որևէ քայլ այդ ուղղությամբ ես չեմ տեսնում, մինչդեռ դա զարգացման լավագույն հեռանկար ունեցող ծրագրերից մեկը կարող է լինել։
Բացի դրանից, պետք է շարունակել էլեկտրոնային առողջապահության ներդրումը, սակայն այլ պայմաններով, օրինակ՝ այդքան մեծ ֆինանսական ծանրաբեռնվածություն չդնել ստոմատոլոգիական կլինիկաների տերերի, դեղատնային ցանցի տերերի և այլնի վրա։
Այսօր ապահովագրական բժշկությունը շատ ցածր և ծիծաղելի գներով է ներդրված, այսինքն բժիշկների վարձատրությունը շատ ցածր է և շատ դեպքերում դրված են այնպիսի գներ, որոնք իրատեսական չեն․ եթե բժիշկը կատարում է վիրահատություն և ապահովագրական ընկերությունն որոշում է, որ այդ վիրահատության համար բժշկին պետք է վճարել 35 կամ 45 հազար դրամ, ապա դա այլևս լուրջ չէ, այսինքն եթե մենք ներդնում ենք բժշկական ապահովագրություն, ապա պետք է բժշկին համապատասխան վարձատրենք, պետք է իսկապես լինի ապահովագրություն և ոչ թե ապահովագրության տնազ, ընդորում այն պետք է հավասարաչափ լինի՝ և ունևոր և չունևոր խավի համար։ Այս հարցը ևս վերանայման կարիք ունի։
Առողջապահական համակարգի թերություններից մեկն էլ վստահության պակասն է պոլիկլինիկական օղակի նկատմամբ․ այս համակարգն անհրաժեշտ է արդիականացնել և համալրել նեղ մասնագետներով և առաջնային օղակի բժշկին, այսինքն ընտանեկան բժշկին՝ թերապևտին, ավելի շատ գիտելիքներով զինել, քանի որ շատ դեպքերում պացիենտը կարող է հիվանդանոցային բուժում ստանալու փոխարեն բուժում ստանալ ամբուլատոր պայմաններում՝ պոլիկլինիկական բժշկի հսկողության տակ և սրանով մենք կբերենք նաև հիվանդանոցների ծանրաբեռնվածության նվազման»,- «Առաջին լրատվական»-ի հետ զրույցում նշեց առողջապահության կազմակերպիչ, բժիշկ-ուրոլոգ Գևորգ Գրիգորյանը՝ խոսելով ձևավորվելիք նոր կառավարության առաջնահերթությունների մասին առողջապահության ոլորտում՝ այս ամենով հանդերձ կարևորելով նաև բժիշկների, նեղ մասնագետների վերապատրաստումների գնալու խնդիրը։
Գևորգ Գրիգորյանի կարծիքով՝ կարևոր չէ, թե առաջիկայում ով կնշանակվի առողջապահության նախարար, այլ կարևորն այն է, որ առողջապահական համակարգի բարելավմանը, արդիականացմանը և զարգացմանը նպաստող ծրագրերն իրագործվեն տեղին և ժամանակին։ Ըստ Գրիգորյանի՝ հայաստանյան առողջապահության ոլորտում առկա խնդիրներն ունեն շատ խորը հիմքեր՝ սկսած համապատասխան կրթությունից, վերջացրած նրանով, որ գլոբալ առողջապահական քաղաքականությունը պետք է իր ուղղվածությունը մի փոքր փոխի, այսինքն՝ էլեկտրոնային առողջապահությունից ու դեղատոմսերից պետք է անցում կատարել առաջնային բուժօգնության օղակի հզորացման, բժշկական տուրիզմի զարգացման և հեռանկարներ ունեցող մի շարք գաղափարների, ծրագրերի իրագործման։
«Առողջապահության նախարարությունը առողջապահության քաղաքականություն որոշող մարմին է, ոչ թե մարմին, որը օրինակ երբ ինչ-որ մեկը տուժում է վթարից՝ նախարարը գնում է նրան այցելության, նկարվում է․ նման բաները չպետք է տեղ ունենան նախարարության մեջ։ Մենք պետք է ունենանք մի քանի տարբեր կառույցներ, որոնք կապակենտրոնացնեն առողջապահության նախարարության այն գործառույթները, որոնք քաղաքակիրթ երկրներում նախարարությունը չի անում»,-հավելեց Գրիգորյանը։
Մանրամասները՝ տեսանյութում։