Հետհեղափոխական Հայաստանում աղմկոտ ձերբակալությունների, բերման ենթարկելու տեսարանների և խուզարկությունների պակաս չկա: Հեղափոխության ոգևորության ալիքը հաղթահարելով կարևոր է, որ իրավապաշտպանները՝ օրենքի ներկայացուցիչները կարողանան օբյեկտիվորեն տեսնել և արձանագրել այն դեպքերը, երբ խախտվում են անձի իրավունքները՝ անկախ այն բանից, թե ինչ վերաբերմունք ունի հասարակությունը տվյալ անձի նկատմամբ:
«Մարդու իրավունքները Հայաստանում բարձրագույն արժեք չեն եղել, հուսանք, որ կամաց-կամաց կդառնան բարձրագույն արժեք»,- «Առաջին լրատվական»- ի հետ թեմայի շուրջ զրույցում ասաց իրավապաշտպան Ավետիք Իշխանյանը:
Անդրադառնալով հարցին, թե հետհեղափոխական Հայաստանում նախկին պաշտոնյաների բերման ենթարկելու, ձերբակալության և խուզարկության ժամանակ արդյոք արձանագրվել են մարդու իրավունքների խախտումներ, նշեց. «Իսկապես հանրությունը կարծեք թե բարկացած սպասում է հաշվեհարդարների և հաճույք է ստանում բացահայտումներից: Բացահայտվում է այն ամեն ինչը, որի մասին գիտեինք, բայց իշխանությունները թաքցնում էին… Գեներալ Մանվելի գործունեության մասին գիտեինք 93 թվականից… Վերջին շրջանում կատարված բացահայտումների արդյունքնում ձերբակալությունների և բերման ենթարկելու ժամանակ խախտումներ չեն եղել: Իմ կարծիքով՝ այս օրերին խուզարկությունները, բերման ենթարկելու դեպքերը հենց այնպես, 37թ-ի նման ներխուժումներ չեն, ամեն ինչի համար նախապես դատարանի թույլտվություն է ձեռք բերվում: Եթե խախտումներ լինեին, փաստաբանները, որոնք պրոֆեսիոնալ իրավաբաններ են, կբարձրաձայնեին այդ մասին»:
Իրավապաշտպանը կարծիք հայտնեց, որ, այնուամենյանիվ, ճիշտ կլիներ, եթե խուզարկությունները, բերման ենթարկելը միանգամից ուղիղ եթերով չհեռարձակվեին. «Ես միշտ դեմ եմ եղել, երբ որևէ կասկածյալի հեռուստացույցով ցույց են տվել»:
Ըստ իրավապաշտպանի՝ բերման ենթարկվողն ունի երեք հիմնական իրավունք. առաջին՝ իր ընտրած մարդուն՝ երրորդ անձին զանգահարել և հայտնել, թե որտեղ է ինքը գտնվում, երկրորդ՝ պահանջել փաստաբան և առանց փաստաբանի որևէ խոսք չասել, երրորդ՝ եթե վատ է զգում կամ վնասվածք է ստացել՝ անհապաղ բժիշկ հրավիրել:
Մանրամասն՝ տեսանյութում: