Կաշառք պահանջած համայնքային ոստիկանը բերման է ենթարկվել ներքին անվտանգության վարչություն
ԵՐԵՎԱՆ, 23 ՓԵՏՐՎԱՐԻ, ԱՐՄԵՆՊՐԵՍ: Ոստիկանության ներքին անվտանգության վարչությունում Իրանի Իսլամական Հանրապետության մի քաղաքացի փետրվարի 22-ին հաղորդում է տվել, որ փետրվարի 19-ի ժամը 18։30-ի սահմաններում, համայնքային ոստիկանության բաժանմունքի ծառայողն իր փաստացի հաշվառումն արագ իրականացնելու պատրվակով իրենից պահանջել է 200 ԱՄՆ դոլար կաշառք։
Ինչպես «Արմենպրես»-ին տեղեկացրին ՀՀ ոստիկանության հասարակայնության հետ կապերի և լրատվության վարչությունից, ոստիկանության ներքին անվտանգության վարչության, քրեական ոստիկանության գլխավոր վարչության և տարածքային բաժնի ծառայողների համատեղ միջոցառումների արդյունքում, ոստիկանության ավագ լեյտենանտը փետրվարի 22-ին՝ կաշառք ստանալու կասկածանքով բերման է ենթարկվել ոստիկանության ներքին անվտանգության վարչություն։
Նախապատրաստված նյութերն ուղարկվել են ՀՀ հատուկ քննչական ծառայություն։
Բաժանորդագրվեք մեր ալիքին Telegram-ում