ՀՀ ֆինանսների նախարարությունում տեղի է ունեցել հանդիպում ՌԴ ֆինանսների փոխնախարարի հետ
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Հայաստանի Հանրապետության ֆինանսների նախարարության և Ռուսաստանի Դաշնության ֆինանսների նախարարության միջև երկկողմ համագործակցության ծրագրի շրջանակներում հունիսի 12-ին ՀՀ ֆինանսների նախարարությունում տեղի է ունեցել հանդիպում ՌԴ ֆինանսների նախարարի տեղակալ Ալեքսեյ Լավրովի հետ:
Ինչպես «Արմենպրես»-ին հայտնեցին ՀՀ ֆինանսների նախարարությունից, ՀՀ ֆինանսների նախարարի առաջին տեղակալ Կարեն Բրուտյանը կարևորել է երկու երկրների ոլորտային գերատեսչությունների ակտիվ համագործակցությունը: Նա նշել է, որ այսօրինակ հանդիպումների և սեմինարների անցկացումն ու փորձի փոխանակումը նպաստում են պետական ֆինանսների ոլորտում իրականացվող բարեփոխումերին:
ՌԴ ֆինանսների փոխնախարարը հայ գործընկերներին է ներկայացրել Ռուսաստանում գործող բյուջետային համակարգի կառուցվածքը, բյուջեի պլանավորման սկզբունքներն ու դասակարգման մոտեցումները, ինչպես նաև բյուջետային գործընթացի տրամաբանությունն ու բարեփոխումների միջնաժամկետ ծրագրերը:
Կարեն Բրուտյանն իր հերթին ներկայացրել է Հայաստանում ներդրվող ծրագրային բյուջետավորման առանձնահատկությունները և ֆինանսների կառավարման արդյունավետության բարձրացմանն ուղղված քայլերը:
Բաժանորդագրվեք մեր ալիքին Telegram-ում