Հատուկ քննչական ծառայությունը մայիսի 14-ին մերժեց քրեական գործ հարուցել ԲՀԿ առաջնորդ Գագիկ Ծառուկյանի կողմից ձեռնարկատիրական գործունեությամբ զբաղվելու վերաբերյալ «Քաղաքացու որոշում» կուսակցության դիմումի հիման վրա:
ՀՔԾ-ն մերժեց քրեական գործ հարուցել հանցադեպի բացակայության հիմքով:
«Առաջին լրատվական»-ին ուշագրավ մանրամասներ են հայտնի դարձել այս գործի վերաբերյալ: Մասնավորապես, որ դիմումը մերժելուց մի քանի օր առաջ Գագիկ Ծառուկյանը ոչ աշխատանքային օրով եղել է Հատուկ քննչական ծառայությունում: Ծառուկյանին ՀՔԾ-ում ծառայողական մուտքով ընդունել է ՀՔԾ պետի տեղակալ Հովհաննես Ենոքյանը և շատ ճոխ ընդունելության արժանացրել նրան:
Մեզ հասած տեղեկություններով Ծառուկյանին ՀՔԾ ուղեկցել է Սյունիքի մարզի դատարանի նախագահ Սամվել Գրիգորյանը, որը Ծառուկյանի սանիկն է և Հովհաննես Ենոքյանի մտերիմ ընկերը: Նրանք երկուսն էլ մոսկվայաբնակ մեծահարուստ Արմեն Գինոսյանի՝ Մանախի Արմենի հովանավորյալները: Հենց վերջինիս «դաբրոյով» էլ Ենոքյանը հեղափոխությունից հետո նշանակվեց ՀՔԾ պետի տեղակալ և Ենոքյանը սկսեց զբաղվել ուշագրավ «բիզնեսով» հետաքրքրված անձանց, կողմերին վաճառելով ի պաշտոնե իրեն հայտնի տեղեկությունները:
Ի դեպ, նույն Ենոքյանը նաև Մարտի 1-ի գործով անցնող, Քննչական կոմիտեի նախագահի նախկին տեղակալ Վահագն Հարությունյանի մտերիմ ընկերն է և հենց Մարտի 1-ի գործի շրջանակներում հսկայական տեղեկություններ է փոխանցել նույն Հարությունյանին:
Թե ինչ պայմանավորվածության են եկել Ենոքյանն ու Ծառուկյանը՝ կարելի է ենթադրել՝ դատելով նույն ՀՔԾ որոշումից:
Ի դեպ, այս օրերին, երբ խոսվում է անցումային արդարադատության, վեթինգի մասին, միանշանակ է, որ վերը թվարկված բոլոր պաշտոնյաները պետք է անցնեն այդ համակարգով: Այլապես հնարավոր չէ պատկերացնել դատավորի, որը Հայաստանի թիվ 1 օլիգարխներից մեկի սանիկն է, ներկայացնում է նրա շահերը իրավապահ մարմիններում, ուղեկցում է նրան: Ի դեպ, ըստ շրջանառվող լուրերի՝ նրա հովանավորյալը՝ Մանախի Արմենը, Մոսկվայում բնակարան է նվիրել դատարանի նախագահ Սամվել Գրիգորյանին:
Նույն կերպ՝ նոր Հայաստանում չի կարող լինել ՀՔԾ բարձրաստիճան պաշտոնյա, որը կասկածելի կապերի մեջ է կասկածելի շրջանակների հետ ու պաշտոնը ծառայեցնում է անձնական շահերին:
Ի դեպ, մեզ հասած տեղեկությունների համաձայն՝ Ենոքյանը ՀՔԾ պետ Սասուն Խաչատրյանից թաքուն է պահել ՀՔԾ կատարած Ծառուկյանի այցի մասին տեղեկությունը: