Մարտի 18-ին Ռուսաստանի Դաշնությունում կայանալու են նախագահական ընտրություններ․ նախագահի թեկնածուները ութն են՝ ՌԴ Պետդումայի պատգամավոր Վլադիմիր Ժիրինովսկին, հեռուստահաղորդավարուհիներ Քսենյա Սոբչակը և Եկատերինա Գորդոնը, ձեռնարկատեր Սերգեյ Պոլոնսկին, բիզնես-օմբուդսմեն Բորիս Տիտովը, «Յաբլոկո» կուսակցության նախագահ Գրիգորի Յավլինսկին, կոմկուսի ներկայացուցիչ Պավել Գրուդինը և գործող նախագահ Վլադիմիր Պուտինը։
Սա ՌԴ-ում կլինի յոթերորդ նախագահական ընտրությունները՝ 1991թ-ից ի վեր։
Ընդդիմադիր առաջնորդ, կոռուպցիայի դեմ պայքարի առաջամարտիկ և Պուտինի ընդդիմախոս Ալեքսեյ Նավալնիին զրկել են առաջադրվելու հնարավորությունից, և նա կոչ է արել բոյկոտել այս ընտրությունները:
«Առաջին լրատվական»-ը փորձեց պարզել՝ հայաստանցիները տեղյա՞կ են հարևան երկրում կայանալիք ընտրությունների և առաջադրված թեկնածուների մասին։ Հարցմանը մասնակցած մեր համաքաղաքացիների կարծիքով՝ այս ընտրությունները ձևական բնույթ են կրում՝ ՌԴ նախագահ կվերընտրվի Վլադիմիր Պուտինը։
«Էնտեղի ընտրությունները Հայաստանի ընտրությունների նման ա, ում ուզում են՝ դնում են, մեկ ա նորից Վլադիմիր Պուտինն ա լինելու»,-կարծիք հայտնեց քաղաքացիներից մեկը։
Մանրամասները՝ տեսանյութում։
