Էդմոն Մարուքյանը Հայաստանում անշրջելի փոփոխությունների մեկնարկի հնարավորություններ է տեսնում
ԵՐԵՎԱՆ, 8 ՄԱՅԻՍԻ, ԱՐՄԵՆՊՐԵՍ: Ազգային ժողովի «Ելք» խմբակցության պատգամավոր Էդմոն Մարուքյանը վստահ է, որ Հայաստանում անշրջելի փոփոխությունների փուլ է մեկնարկում: Ազգային ժողովի հատուկ նիստում ՀՀ վարչապետի ընտրության հարցի քննարկման ընթացքում իր ելույթում Էդմոն Մարուքյանն ընդգծեց, որ բոլորը պետք է ուրախանան՝ անկախ իրենց քաղաքական հայացքներից և կուսակցական պատկանելությունից, որովհետև, վերջապես, Հայաստանում գալիս է փոփոխությունների ժամանակը: «Մենք ունենք հնարավորություն այդ փոփոխությունները նյութականացնելու և Հայաստանի քաղաքացիների կյանքն ավելի երջանիկ դարձնելու»,- «Արմենպրես»-ի փոխանցմամբ՝ նշեց Մարուքյանը:
Էդմոն Մարուքյանը շեշտեց, որ ՀՀ-ում գործող հին համակարգը քանդվել է, և հնարավորություն կա կառուցել նորը, որը խարսխված կլինի ավելի կարևոր արժեքների վրա: «Ես բոլոր իմ գործընկերներին կոչ եմ անում աջակցել այդ հնարավորությանը»,- ասաց նա:
Մարուքյանը բոլորին կոչ արեց լծվել առաջիկա փոփոխություններին՝ շեշտելով, որ Ազգային ժողովի «Ելք» խմբակցությունը կանգնած է լինելու Նիկոլ Փաշինյանի և նրա կառավարության թիկունքում, պաշտպանելու է այդ կառավարության ծրագրերը:
Բաժանորդագրվեք մեր ալիքին Telegram-ում