Արմավիրի մարզպետ Աշոտ Ղահրամանյանի խորհրդական, 52-ամյա Մանուկ Սիմոնյանի սպանությունը բացահայտվել է և կա ձերբակալված անձ: Այդ մասին տեղեկացնում է Քննչական կոմիտեն:
Ավելի վաղ տեղեկացրել էինք, որ հուլիսի 23-ին Մանուկ Սիմոնյանը տանից դուրս է եկել և չի վերադարձել:
Քննչական կոմիտեն տեղեկացրել էր՝ նախնական տվյալներով՝ տան բակից Մ. Սիմոնյանին կանչել է մի տղամարդ, ինչից հետո նա դուրս է եկել տանից՝ առանց ասելու, թե ուր է գնում և այլևս չի վերադարձել:
Ձեռնարկված միջոցառումների արդյունքում՝ հուլիսի 25-ին՝ ժամը 23.30-ի սահմաններում, Արմավիրի մարզի Մյասնիկյան-Դալարիկ ճանապարհի 3-րդ կմ-ից դեպի աջ ընկած՝ մոտ 300 մ հեռավորությամբ գտնվող «Դալարիկի ձոր» կոչվող տարածքում, հայտնաբերվել է 1965 թ. ծնված Մանուկ Սիմոնյանի դիակը՝ կապկպված:
Դեպքի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի հատկանիշներով, որով նախաքննությունը կատարվում է Արամավիրի մարզային քննչական վարչության վարույթում։
Նշանակվել է դատաբժշկական փորձաքննություն՝ մահվան պատճառը պարզելու նպատակով։
Մանուկ Սիմոնյանի սպանության գործը ՀՀ քննչական կոմիտեի նախագահի հանձնարարությամբ քննվում է ՀԿԳ քննության գլխավոր վարչությունում: