«Որևէ նոր հնարավորություն չի ստեղծվել Իրանից մատակարարվող գազի ծավալներն ավելացնելու ուղղությամբ՝ հաշվի առնելով այն հանգամանքը, որ Իրանից գազը գնում է հենց «Գազպրոմ»-ը»,- «Առաջին լրատվական»-ի հետ զրույցում ասաց իրանագետ Էմմա Բեգիջանյանը՝ անդրադառնալով վերջին շրջանի քննարկումներին, թե Ռուսաստանի կողմից սահմանին գազի գնի թանկացումը կարող է պատճառ դառնալ՝ ավելացնելու Իրանից մատակարարվող գազի ծավալները։
«Հայաստանի համար գազի մատակարարման ամբողջ մենաշնորհը տրված է «Գազպրոմ»-ին, հետևաբար նա պետք է թույլ տա ավելացնել, թե նվազեցնել ծավալները։ Պետք է «Գազպրոմը» մեզ թույլատրի ունենալ երկրորդ օպերատորը, ինչը, ըստ էության, անհնար է։ Դա շատ գլոբալ հարց է, որը պետությունը պետք է լուծի Ռուսաստանի հետ»,- ասաց Բեգիջանյանը՝ հավելելով, որ ռուս-իրանական փոխհարաբերությունների թեկուզ հարկադրված բարելավման պայմաններում Իրանը չի փորձի դեմ դուրս գալ Ռուսաստանին և ավելացնել Հայաստան մատակարարվող գազի ծավալները։ «Հետևաբար, չեմ կարծում, որ որևէ նոր հեռանկար կամ հնարավորություն կա այս մասով»,- ընդգծեց իրանագետը։
Առավել մանրամասն՝ տեսանյութում։