«Ոսկե ծիրանի» մեկնարկը տրված է
Կարեն Դեմիրճյանի անվան մարզահամերգային համալիրում մեկնարկեց Երևանի 16-րդ «Ոսկե ծիրան» միջազգային կինոփառատոնը։ Կարմիր գորգով անցան փառատոնի հյուրերը, այնուհետև կայացավ բացման արարողությունը։ Փառատոնի շրջանակում Հայաստան են ժամանել հանրահայտ դերասաններ, ռեժիսորներ, կինոաշխարհի ներկայացուցիչներ։ Կինոփառատոնի հատուկ հյուրն է մեքսիկացի հանրահայտ կինոռեժիսոր, միջազգային մրցույթների դափնեկիր Կառլոս Ռեյգադասը: Փառատոնի մեկնարկային ֆիլմն է Կաննի միջազգային կինոփառատոնում «Ոսկե արմավենու ճյուղ» մրցանակի այս տարվա դափնեկիր Չուն-հո Պոնի «Մակաբույծը» (Հարավային Կորեա)։
Երևանի «Ոսկե ծիրան» միջազգային կինոփառատոնի հիմնադիր տնօրեն Հարություն Խաչատրյանը լրագրողների հետ զրույցում ասաց, որ այս տարի աշխատում է նոր թիմ ՝ երիտասարդներ, որոնք իրենց առաջին ինքնուրույն փառատոնն են անում։
«Սովորել են մեզ մոտ, աշխատել են մեզ մոտ, զբաղվել են տարբեր աշխատանքներով, բայց որպես ղեկավարներ առաջին անգամ, կարծես, իրենց զորքը տանում են պատերազմի կամ հաղթանակի։ Այսօր տեսնում եմ, որ հաղթանակ է լինելու, որովհետև հետաքրքիր մտածողություն ունեն, լավ հյուրեր, ֆիլմեր են ընտրել, լավ դիզայն»,- ասաց նա։
ՀՀ կրթության, գիտության, մշակույթի և սպորտի նախարարի տեղակալ Արա Խզմալյանը նշեց, որ մինչև փառատոների մեկնարկը պետք է լուրջ աշխատանք տանեն բոլոր փառատոների ղեկավարների հետ բովանդակային առումով։
«Սա չի վերաբերում միայն «Ոսկե ծիրանին»։ Ի վերջո որքան ավելի շուտ հրաժարվենք մեկական հանդիսության տրամաբանությունից, ինչքան ավելի շատ ապահովենք այս կամ այն միջոցառման ազդեցության տևականությունը, այնքան ավելի արդարացված են և պետական միջոցները, այնքան ավելի մեծ է և տվյալ փառատոնի հեղինակությունը ինչպես երկրի ներսում, այնպես երկրի սահմաններից դուրս։ Կարծում եմ, որ «Ոսկե ծիրանը» իրականում շատ լավ հարթակ է միջազգային կինոմիտումները մեզ ներկայացնելու, միջազգային կինոպրոցեսները և հայկական կինոարտադրությունն ապահովելու համար։ Բնականաբար, բովանդակային աշխատանք կա տանելու։ Կարծում եմ, որ «Ոսկե ծիրանը» այն փառատոներից է, որը դեռ լիարժեք չի դրսևորել իր ամբողջ ներուժը և մինչև վերջ չի իրականացնել իր հնարավորությունները։ Սա լավ է, նշանակում է, որ «Ոսկե ծիրանը» ապրող, զարգացող փառատոն է»,- ասաց փոխնախարարը։
Նախքան փառատոնի մեկնարկը Շառլ Ազնավուրի հրապարակում կայացավ հոբելյանական պատվո աստղերի տեղադրում ռեժիսորներ Բագրատ Հովհաննիսյանի 90, Արման Մանարյանի 90 և Գենադի Մելքոնյանի 75-ամյա հոբելյանների առիթով:
Միջազգային կինոփառատոնն աշխարհի տարբեր երկրներից ստացել է մասնակցության ավելի քան 740 հայտ, ինչպես նաև աշխարհի հեղինակավոր կինոփառատոներից՝ Կաննից, Բեռլինից, Ռոտերդամից, ընտրվել են մի շարք կինոնկարներ: Փառատոնն ունի միջազգային լիամետրաժ (խաղարկային և վավերագրական) մրցութային ծրագիր, որը ներառում է 12 ֆիլմ ավելի քան 17 երկրներից և կարճամետրաժ ֆիլմերի տարածաշրջանային մրցույթ, որը ներառում է 25 ֆիլմ՝ Հայաստանից, Թուրքիայից, Իրանից և Վրաստանից:
Այս տարվա լիամետրաժ մրցույթի ժյուրին կնախագահի ճանաչված կինոռեժիսոր Ալեքսանդր Մինդաձեն, իսկ փառատոնի հատուկ հյուրն է մեքսիկացի հանրահայտ կինոռեժիսոր, միջազգային մրցույթների դափնեկիր Կառլոս Ռեյգադասը: Կարճամետրաժ ֆիլմերի տարածաշրջանային մրցույթի ժյուրիի նախագահն է ռեժիսոր Պիպո Մեցապեսան (Իտալիա): Ժյուրիի կազմում ընգրկված են նաև օպերատոր Նորայր Կասպերը (Կանադա) և «Clermont-Ferrand» կինոփառատոնի ծրագրերի տնօրեն Ժորժ Բոլոնը:
«Ոսկե ծիրանի» շրջանակում կանցկացվի նաև կինոլորտի երիտասարդ մասնագետների զարգացման «Talent Lab» ծրագիրը: Այն առաջին անգամ իրականացվելու է փառատոնի օրերին` հուլիսի 9-12-ը: «Talent Lab»-ը բաղկացած է չորս աշխատարանից, որոնք նախատեսված են դերասանների, պրոդյուսեր/ռեժիսորների, նկարիչների, կինոքննադատների համար: Աշխատարանի պաշտոնական բացումը տեղի կունենա հուլիսի 9-ին, ժամը 10:00-ին, Հենրիկ Մալյանի անվան թատրոնի դահլիճում: Դասընթացներն անցկացվելու են Հայաստանի կինեմատոգրաֆիստների միության շենքում:
«Ոսկե ծիրանն» այս տարի ունի նաև նոր տարբերանշան, որն արտահայտում է փառատոնի նոր կազմի ինքնատիպ մոտեցումը 16-րդ տարին անցկացվող իրադարձությանը: Այն մինիմալիստական է, ներկայացնում է հայերեն «Ծ» տառը: Այդ տառի միջոցով լոգոյի հեղինակը փորձել է ստանալ փառատոնի խորհրդանիշ համարվող ծիրանը:
Հարակից հրապարակումներ`
- «Ոսկե ծիրանը»-ը կմեկնարկի Չուն-հո Պոնի «Մակաբույծը» ֆիլմով
- Հուլիսի 7-ին կմեկնարկի «Ոսկե ծիրան» 16-րդ միջազգային կինոփառատոնը
- «Ոսկե ծիրանի» ազդագրային արվեստը
- «Ոսկե ծիրան». «Տիտանիկի» դերասանների հետ աշխատած մասնագետը կգա Հայաստան
- «Ոսկե ծիրանը»՝ ՀՀ-ում հավատարմագրված դեսպանների գնահատմամբ
- «Ոսկե ծիրանի» ֆիլմերն ու ժյուրին
- Հանրահայտ կինոռեժիսոր Կառլոս Ռեյգադասը «Ոսկե ծիրան»-ի հատուկ հյուրն է
- «Ոսկե ծիրանի» երիտասարդ կազմն ամեն ինչ անում է այն իսկապես կինոտոն դարձնելու համար
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ