Եվրախորհրդարանի 16 պատգամավոր հանդես են եկել նախաձեռնությամբ՝ Արտաքին գործերի և անվտանգության քաղաքականության Եվրոպական Միության Բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինիից հետաքրքրվելով, թե ինչո՞ւ Հարավային Կովկասի ԵՄ հատուկ ներկայացուցիչները և եվրոպացի այլ պաշտոնյաներ երբևիցե չեն այցելել Լեռնային Ղարաբաղ՝ չնայած, որ ունեն օրինական իրավունք։
Եվրախորհրդարանի պատգամավորները նաև հետաքրքրվում են, թե ինչու Հանձնաժողովի փոխնախագահն ու ԵՄ բարձր ներկայացուցիչը Լեռնային Ղարաբաղի ժողովրդի կարծիքը չի քննարկում, մինչդեռ այն կարևոր է խաղաղ կարգավորման գործընթացում։
ԵԽ պատգամավորների այս նախաձեռնությունը ողջունում է ՀՅԴ Հայ դատի Եվրոպայի հանձնախմբի գրասենյակի նախագահ Գասպար Կարապետյանը՝ ընդգծելով, որ թեև միջազգային պրակտիկայում չկա համապատասխան նորմ, Ադրբեջանը ստեղծել է այսպես կոչված «սև ցուցակ», որն օգտագործում է որպես շանտաժի միջոց՝ կանխելու արևմտյան քաղաքական և հասարակական գործիչների այցելությունը Լեռնային Ղարաբաղ։ «Ադրբեջանի կառավարությունը կիրառում է բոլոր հնարավոր միջոցները, որպեսզի չեղարկի միջազգային կազմակերպությունների ներգրավվածությունը Լեռնային Ղարաբաղում՝ հատկապես ժողովրդավարության հաստատման, կրթության և տնտեսական զարգացման ուղղությամբ։ Իհարկե ԵԱՀԿ Մինսկի խումբը հակամարտության կողմերի համար ընդունելի միջնորդ է, բայց որպես փափուկ ուժ, Եվրոպական միությունը կարող է և պետք է անի ավելին, որպեսզի նպաստի հակամարտության խաղաղ կարգավորմանը»- նշում է Գասպար Կարապետյանը։
Նա հավելում է՝ ողջունելի է, որ Եվրոպական միությունը կրթական և հասարակական տարբեր ծրագրեր է իրականացնում տարածաշրջանի տարբեր հակամարտող գոտիներում, ինչպես, օրինակ, Հարավային Օսիայում և Աբխազիայում. «Բայց մենք մինչ այժմ չունենք որևէ բացատրություն, թե ինչու ԵՄ-ն դա չի անում Արցախում և ինչու չի լսում այնտեղ ապրող մարդկանց կարծիքը»։
Այն փաստը, որ Եվրոխարոհրդարանի տարբեր քաղաքական խմբեր ներկայացնող այդքան շատ խորհրդարանականներ այս հարցը բարձրացրել են, ըստ Կարապետյանի՝ ցույց է տալիս, որ ԵՄ օրենսդիրներն ավելի քաջատեղյակ են դառնում Արցախի ժողովրդի շարունակական սոցիալ-տնտեսական մեկուսացմանը։ «Կարևոր է հասկանալ, թե ինչու են ԵՄ պաշտոնյաները խուսափում այցելել Լեռնային Ղարաբաղ՝ չնայած այն հանգամանքին, որ դա ամենալավ ճանապարհն է «առաջին ձեռքից» ինֆորմացիա ստանալու համար»,- եզրափակեց Կարապետյանը։
ՀՅԴ Հայ դատի Եվրոպայի հանձնախմբի գրասենյակի հաղորդակցության պատասխանատու Հարութ Շիրինյանից տեղակացանք, որ այս պահի դրությամբ որևէ արձագանք այս հարցմանը չկա, այն կլինի հավանաբար առաջիկա 6 շաբաթների ընթացքում։ Իսկ մինչ այդ, հանձնախումբը՝ փետրվարի 27-ին Եվրախորհրդարանում Արցախին նվիրված կոնֆերանս է անցկացնելու։