«Բոքսի տանձիկ ՀՀԿ-ն», «որպես մի նոր Հիսուս խաչված ազգը», «Գորիսում չծեծված Մենուան». Քարոզարշավ, օր 3-րդ

PanARMENIAN.Net - Նոյեմբերի 28-ին արտահերթ խորհրդարանական ընտրություններին մասնակցող քաղաքական ուժերը շարունակեցին հանդիպումները ընտրողների հետ Երևանի տարբեր վարչական շրջաններում, մարզերում, ասմունքեցին, հայտարարություններ արեցին, միմյանց բանավեճի հրավիրեցին: PanARMENIAN.Net ն ամփոփում է քարոզարշավի 3-րդ օրը:

Ով է «Սասնա ծռերի» և Փաշինյանի միջև «սեպ խրողը»

«Սասնա ծռեր» կուսակցության ներկայացուցիչ Ժիրայր Սեֆիլյանը լրագրողների հետ զրույցում հայտարարեց, որ նախկին իշխանական մեդիան և որոշ ուժեր «փորձում են սեպ խրել» իրենց և ՀՀ վարչապետի պաշտոնակատար, «Իմ քայլը» դաշինքի առաջնորդ Նիկոլ Փաշինյանի միջև:

Մինչդեռ, ինքը՝ Փաշինյանը, քարոզարշավի մեկնարկին անդրադառնալով «Սասնա ծռերի» հայտարարությանը, թե դեկտեմբերի 9-ին ընտրվելիք խորհրդարանը երկու տարվա կյանք է ունենալու, ասաց՝ «չշշկռվեք»:

Դուք ո՞վ եք. Մարուքյանը՝ «Ծռերին»

«Լուսավոր Հայաստան» կուսակցության առաջնորդ Էդմոն Մարուքյանը նույնպես անդրադարձավ «Սասնա ծռերի» հայտարարությանը:

«Դուք ո՞վ եք, որ որոշեք, թե այս խորհրդարանը քանի տարվա կյաքն է ունենալու», - ասաց նա:

«Ծռերը»՝ «Մենքի» և «Լուսավոր Հայաստանի» մասին

«Սասնա ծռերից» ՀՀ ԱԺ պատգամավորի թեկնածու Գարեգին Չուգասզյանը հայտարարեց, որ «Մենք» դաշինքը և «Լուսավոր Հայաստան» կուսակցությունը «տատանվող ուժեր են»:

«Անգամ հեղափոխությանն ընկրկեցին, չմասնակցեցին», -ասաց նա:

ՔՈ-ն հրավիրում է խարույկի շուրջ զրույցի

«Քաղաքացու որոշում» սոցիալ-դեմոկրատական կուսակցությունը քարոզարշավի երրորդ օրը նույնպես մանդարիններ բաժանեց՝ այս անգամ Շենգավիթ վարչական շրջանում: Իսկ երեկոյան քաղաքացիներին հրավիրեց խարույկի շուրջ զրույցի:

«Խաչված որպես մի նոր Հիսուս»

«Լուսավոր Հայաստան» կուսակցության համամասնական ցուցակի երրորդ համար, լրագրող Արման Բաբաջայանը, ընտրողների հետ հանդիպմանն արտասանեց իր գրած բանաստեղծությունը:

Սարգսյանը՝ ՀՀԿ-ի «սև» պաստառների մասին. Ոչ Շանելն եք, ոչ էլ` Վերսաչին

«Մենք» դաշինքից Արամ Սարգսյանն Արթիկում ընտրողների հետ հանդիպմանը քննադատեց նախկին իշխող «Հայաստանի հանրապետական կուսակցությանը»: Անդրադառնալով կուսակցության «սև» նախընտրական պաստառներին՝ նա հայտարարեց, որ ՀՀԿ-ականները «ոչ Կոկո Շանելն են, ոչ էլ Ջիանի Վերսաչին»:

«Դուք գորշ եք, գորշ», - ասաց Սարգսյանը:

ՀՀԿ-ն՝ իշխանության «բոքսի տանձիկ»

Էդմոն Մարուքյանը լրագրողների հետ զրույցում ՀՀԿ-ին նոր իշխանություններին «բոքսի տանձիկ անվանեց»:

«ՀՀԿ-ն գործող իշխանության համար կարող է լինել բոքսի տանձիկ խորհրդարանում, որ բոքս անի, ձեռքը պարապեցնի վրաները: Հայաստանի քաղաքական կյանքի առողջացման համար մեզ խորհրդարանում բոքսի տանձիկ պետք չէ, մեզ պետք է նորմալ քաղաքական միավոր, որն ունի անցած ճանապարհ և այդ ճանապարհով հանդերձ կարող է սկզբունքային ու գաղափարական հահակշիռ լինել ու երկիրը տանել առաջ», - ասաց նա:

Բանավեճի հրավեր

«Հայաստանի հանրապետական կուսակցության» համամասնական ցուցակի առաջին համար Վիգեն Սարգսյանը ֆեյսբուքյան գրառմամբ բանավեճի հրավիրեց Փաշինյանին: «Իմ քայլը» դաշինքի մաս կազմող «Քաղաքացիական պայմանագիր» կուսակցության մամուլի քարտուղար Վահան Կոստանյանն էլ արձագանքեց՝ Փաշինյանը նախկինում արդեն հայտարարել էր՝ պատրաստ է գալ բանավեճի բոլոր կուսակցությունների և դաշինքների առաջին դեմքերի մասնակցությամբ։ Իսկ միայն Սարգսյանի հետ բանավիճելու մասով նա նկատեց՝ «ինչո՞վ է Վիգեն Սարգսյանն ուրիշներից առավել»։

«80%-անոցը 4%-անոցի հետ չի բանավիճում»

Էդմոն Մարուքյանը նույնպես մեկնաբանեց Սարգսյանի՝ Փաշինյանին բանավեճին հրավիրելը: «4% ձայնի հավակնողն ինչպե՞ս կարող է բանավիճել 80% ձայն հավակնողի հետ», - մասնավորապես ասաց նա:

Մենուա Հարությունյանին Գորիսում չեն ծեծել

ՀՀԿ-ի համամասնական ցուցակի առաջին տասնայկում ընդգրկված Մենուա Հարությունյանը արձանագրեց՝ իրեն Գորիսում չեն ծեծել:

«Ինձ Գորիսում չեն ծեծել, եթե իմ դեմ մարդ չուղարկեն` ժողովուրդը ինձ հետ կռիվ չի անի։ Ես քաղաքական տղա եմ և քննադատում եմ նրանց, ովքեր խաբում են ժողովրդին, բոլորը գիտեն, որ ես վախկոտ տղա չեմ, ինձ մանդատ տվեք, որպես ընդդիմադիր գնամ Նիկոլին քննադատեմ», -հայտարարեց Մենուա Հարությունյանը:

Բաբլոյանը առաջարկեց քարոզարշավում չքննարկել ԼՂ հարցը

ՀՀ Ազգային ժողովի նախագահ Արա Բաբլոյանը հանդես եկավ հայտարարությամբ, որում ընտրապայքարի մեջ մտած ուժերին հորդորեց նախընտրական ելույթներից հանել Արցախյան հիմանահարցի վերաբերող հատվածները:

Ծառուկյանն ասում է՝ բարեգործությամբ երկիր չես կառուցի

«Բարգավաճ Հայաստան» կուսակցության առաջնորդ Գագիկ Ծառուկյանը քարոզարշավի երրորդ օրը Իջևանում էր: Նա ուշագրավ հայտարարություն արեց, որ միայն բարեգործությամբ երկիր չեն կառուցում, միևնույն ժամանակ հայտարարեց՝ որ «արել է, անում է և անելու է»:

«Ես իմ թիմին ասել եմ՝ հանկարծ ժողովրդից չնեղանաք, չպարտադրեք, ում կվստահեն, ում կտան իրենց ձայնը՝ կտան», - ասաց նա:

Աշոտյանն արդեն 3-րդ օրն է՝ «դռնեդուռ չընկավ»

«Հայաստանի հանրապետական կուսակցության» փոխնախագահ Արմեն Աշոտյանը քարոզարշավի մեկնարկին ասաց՝ «դռնեդուռ է ընկելու»՝ հանդիպելու ընտրողներին:

Երրրորդ օրն է՝ նա չի կատարել խոստումը:

Ալեքսանդր Սարգսյանը վերադրձնում է $30 մլն-ը, Ավետիսյանը՝ «Գոլդեն Փելեսը»

Փաշինյանը Իջևանում նախընտրական հանդիպման ընթացքում հայտարարեց, որ ՀՀ մաքսային ծառայության նախկին պետ Արմեն Ավետիսյանի ընտանիքը դիմել է Պետական գույքի կառավարման վարչություն՝ հայտնելով, որ Ծաղկաձորի «Գոլդեն Փելես» հյուրանոցն ուզում է նվիրել պետությանը:

Նա հայտարարեց նաև՝ ՀՀ երրորդ նախագահ Սերժ Սարգսյանի եղբայր Ալեքսանդր Սարգսյանը պատրաստակամություն է հայտնել պետությանը վերադարձնել իր բանկային հաշիվներից մեկում եղած $30 մլն-ը:

Ընթերցեք նաև՝ «Միքայելյանի «ասկոլկաները», Երանոսյանի «մեծահոգությունը» և «Ադրբեջանից ավելի վտանգավոր Փաշինյանը». Քարոզարշավ, օր 2-րդ»: