«Բելինդան» ֆիլմ է համարձակության, սիրո, կյանքի մասին
ԵՐԵՎԱՆ, 12 ՀՈՒԼԻՍԻ, ԱՐՄԵՆՊՐԵՍ: «Ոսկե ծիրան» 14-րդ միջազգային կինոփառատոնի վավերագրական ֆիլմերի մրցույթում ներկայացված է ռեժիսոր Մարի Դյումոռայի «Բելինդա» կինոնկարը: Այն անդրադառնում է Բելինդայի կյանքին, նրա հույզերին, ապրումներին, ցանկություններին ու երազանքներին: Ժապավենի մասին հուլիսի 12-ին լրագրողների հետ հանդիպմանը խոսեց ռեժիսորը:
«Կարծում եմ, որ Երևանի հանդիսատեսի ու երիտասարդ ռեժիսորների համար «Ոսկե ծիրան»-ը կարևոր փառատոն է, որի ընթացքում ռեժիսորները կարողանում են կիսել իրենց փորձառությունը»,- «Արմենպրես»-ի հաղորդմամբ`նշեց ֆրանսիացի ռեժիսոր Մարի Դյումոռան:
Ռեժիսորն ասաց, որ ֆիլմը պատմում է Բելինդա անունով աղջկա մասին, որն աղքատության մեջ է ապրում: «Մենք նրան նկարել ենք ինը տարեկանից ու ճանապարհորդում ենք այդ կենսուրախ աղջկա հետ մինչ նա կդառնա քսաներեք տարեկան: Ֆիլմում ներկայացված են այն խնդիրները, որոնց աղջիկը բախվում է մանկատանը: Նա դերասանուհի չէ, բայց կերպար է, որի միջոցով կարողացա խոսել բոլոր աղջիկների անունից` ներկայացնելով համամարդկային խնդիրները»,-ընդգծեց նա:
9-ամյա Բելինդային դժվար է վախեցնել: Նա սիրում է կյանքը, ձյունը, սահքը սառույցի վրա, այն մանկատունը, որտեղ ապրում են ինքն ու քույրը, իսկ քրոջը ամենից շատ է սիրում: Տեսուչները նրանց բաժանում են, և նորից միասին լինելու համար քույրերը գիշերով փախչում են անտառներով: 15-ամյա Բելինդան ապրում է մոր հետ և մտադիր է դառնալ քրոջ որդու` Նիկոլայի կնքամայրը: 23-ամյա Բելինդան հիմա հոր`Ֆրանցի հետ է ապրում: Առաջվա պես շրջազգեստներ է սիրում, բարձրակրունկ կոշիկներ և մազերը ծոծրակին հավաքել: Բայց ամենից շատ Թիերիին է սիրում, նրա կապույտ աչքերն ու Վոգեզների շրջանում ապրողի առոգանությունը: Բելինդան գալիս է բանտից արձակված Թիերիին դիմավորելու: Նրանք ուզում են ամուսնանալ, որպեսզի իրենց ոչինչ չբաժանի նորից, բայց...
«Ոսկե ծիրան» փառատոնն 2017-ն ստացել է 1100 հայտ՝ 96 երկրից: Մրցութային ու արտամրցութային ծրագրերում ընդգրկվել են ավելի քան 100 ֆիլմ։
«Ոսկե ծիրան» փառատոնի բացմանը կներկայացվի Համո Բեկնազարյանի «Խասփուշ» ֆիլմը, քանի որ այս տարի լրանում է ժապավենի նկարահանման 90-ամյակը: Փառատոնի փակմանը կինոյի երկրպագուների համար կցուցադրվի
ռեժիսոր Ջո Բեռլինգերի «Բնաջնջման մտադրությունը» կինոնկարը:
«Ոսկե ծիրան» միջազգային կինոփառատոնն անցկացվում է 2003 թվականից: Այն տարեցտարի ընդլայնել է իր աշխարհագրությունը` Հայաստան բերելով աշխարհի տարբեր ծայրերում ապրող և ստեղծագործող ռեժիսորների, դերասանների, պրոդյուսերների ֆիլմերը:
Բաժանորդագրվեք մեր ալիքին Telegram-ում