Երևանի Էրեբունի վարչական շրջանում Weekend բիլիարդ բարում նախնական տվյալով քաղաքացուն պատանդ վերցրած տղամարդուն վնասազերծել են դիպուկահար կրակոցով: Տեղի ունեցածը խիստ նշանային իրադարձություն է երկրում քրեածին վիճակի սրման ֆոնին:
Պաշտոնական վիճակագրությունը փաստում է, որ նախորդ տարվա համեմատ ծանր հանցագործությունները չեն աճել: Եթե նույնիսկ դա այդպես է «կատարելագործվել» է հանցագործությունների «որակը», սպանությունները, ինքնադատաստանի դեպքերն այնքան մասշտաբային բնույթ են ստացել, որ վերջին ամիսների Հայաստանն արդարացիորեն համեմատվում է Սիցիլիայի հետ:
Քրեական այս միջավայրում անօգնական վիճակում էր հայտնվել ոստիկանությունը, որին էլ ուղղվում էին քննադատության հիմնական սլաքները` թեև քրեա-օլիգարխիկ համակարգի տրանսֆորմացիան անարյուն տեղի ունենալ չի կարող:
Մյուս կողմից` տեսակետ է հնչում, որ ոստիկանության գործողությունների արդյունավետության անկումը պայմանավորված է այն անորոշությամբ, ինչը հետևանք է հենց ոստիկանությունում մյուս տարի սպասվող կառուցվածքային փոփոխությունների:
Օրեր առաջ, երբ վիրավորվել էր ՊՊԾ գնդի հրամանատարի տեղակալը, մենք կանխատեսել էինք, թե շուտով պետք է սպասել ոստիկանապետ Վլադիմիր Գասպարյանի կտրուկ պատասխանին: Այսօր ոստիկանությունը հերթական հանցագործին վնասազերծել է մարտական սերիալների ոճով: Ոստիկանությունում պնդում են, որ այլընտրանք չեն ունեցել, որովհետև մեկ ժամ տևած բանակցություններն անարդյունք են անցել: Իհարկե, ենթադրվում է, որ իրավապաշտպան կազմակերպությունների համար այս պնդումները համոզիչ չեն լինելու:
Տեղի ունեցածը կարելի է համարել Վլադիմիր Գասպարյանի դիպուկ պատասխանը քրեական աշխարհին, նույնիսկ` համակարգի քրեա-օլիգարխիկ սեգմենտին:
Իհարկե, դրանից վիճակի ողբերգականությունը չի պակասում: Մեր հասարակության քրեականացումը նոր թափ է առնում ու դա է գործող համակարգի գործունեության ամեածանր հետևանքը: