«Վազգեն Սարգսյանը մեր հավաքական կերպարն էր ներկայացնում՝ ոչ միայն ազատամարտիկների, այլ ամբողջ ազգի. նա ծվեց ճիշտ ժամանակին, ճիշտ տեղում»,- «Առաջին լրատվական»-ի հետ զրույցում այս մասին ասաց սպարապետ Վազգեն Սարգսյանի մարտական ընկեր, Ազատամարտիկների դաշինքի խորհրդի անդամ Ռազմիկ Պետրոսյանը՝ նաև հիշելով դրվագներ, թե ինչպես Վ. Սարգսյանը դարձավ առաջնորդ, կարողացավ առանձին ջոկատներ միավորելով՝ կազմավորել հայկական բանակը: «Նա իր կեցվածքով, էությամբ ու վերաբերմունքով ընդգծված լիդեր էր, կարողանում էր իր խոսքով ազդեցություն թողնել յուրաքանչյուրիս վրա» նշեց Ռ. Պետրոսյանը:
Վազգեն Սարգսյանն ավելի շատ քաղաքականության մե՞ջ էր ավելի հմուտ թե՞ռազմական գործում: Ռազմիկ Պետրոսյանի դիտարկմամբ՝ կան անհատներ, որոնք ի վերուստ օժտված են և հայտնվում են ճիշտ տեղում, ճիշտ ժամանակին, սպարապետը հենց ծնված էր այդպիսին. «Նա թե՛ քաղաքական դաշտում, թե՝ ռազմական, խարիզմատիկ լիդեր էր: Ժամանակին բոլոր արժեքները չեն գնահատվում… Վազգենը կապող օղակ էր… ֆիդայիների զսպաշապիկը: Հետագայում բանակաշինության մեջ կարողացավ գլխավոր՝ կադրային խնդիրը լուծել, նա ունակ անձ էր»:
Ռազմիկ Պետրոսյանի կարծիքով՝ Վազգեն Սարգսյանի՝ վարչապետի պաշտոնը ստանձնելը ոչ միայն ճիշտ քայլ էր, այլ նույնիսկ անհրաժեշտություն էր. «Վ. Սարգսյանն ասում էր՝ մեր բանակը զարգացել, առաջ է գնացել, իսկ տնտեսությունը հետ է մնացել, պետք է ոչ թե բանակը հետ տանենք՝ տնտեսությանը հասցնենք, այլ տնտեսությունը պետք է արագ զարգացնենք: Այս խնդիրը հիմա էլ արդիական է»:
Ազատամարտիկի խոսքով՝ Վազգեն Սարգսյանը նպատակներ ու ծրագիր ուներ, բայց 1999թ. Հոկտեմբերի 27-ից հետո մեր երկիրը շեղվել էր. «2018թ. հեղափոխությունը մեզ հետ բերեց Վ. Սարգսյանի ուզած կետին, և հնարավորություն տրվեց ուղղվել, հիմա այդ ճանապարհի վրա ենք»:
Մանրամասն՝ տեսանյութում: