Փողոցում կոտրեցին Սերժ Սարգսյանի դիմանկարը (լուսանկարներ)
«ՄերժիրՍերժին » ակցիայի մասնակիցները ավելի քան մեկ ժամ առաջ փակել են Երեւանի Դավիթ Անհաղթ-Ուլնեցի փողոցների խաչմերուկը:Տասնյակ վարորդներ ազդանշաններով միանում են ցուցարարներին: Թեեւ այստեղով դեպի Նոր Նորք եւ Ավան տանող ճանապարհները գրեթե կաթվածահար են եղել, բայց տեղում գտնվող ոստիկանները չեն փորձում բացել փողոցը կամ որեւէ կերպ խոչընդոտել ակցիան: Ակցիայի մասնակիցները «հանդիսավոր պայմաններում» խաչմերուկի մեջտեղում կոտրեցին Սերժ Սարգսյանի դիմանկարը: Ոստիկանների գործողությունները ղեկավարող գնդապետը գետնից վերցրեց կոտրած նկարը, վրայից մաքրեց ապակու փշուրները եւ տարավ դրեց ոստիկանական մեքենան: Ցուցարարները նրա հետեւից վանկարկում էին՝ «Ապրի՛ պարոն գեներալը»: Ի դեպ. ակցիայի մասնակիցները պնդում էին,ո ր Սերժ Սարգսյանի լուսանկարը դպրոցներից մեկից է բերվել բայց տեղեկատվությունը ճշտել չհաջողվեց։ Ավելի ուշ, ակցիայի մասնակիցները մեքենաներով ու ոտքով շարժվեցին դեպի Նոր Նորք: Լուսանկարները՝ Հակոբ Կարապետյանի