Դաշնային անվտանգության ուժերի երկու գնդապետներ՝ կենտրոնական աշխատակազմի ծառայություններից մեկի պետը՝ Անդրեյ Կուտերնինը եւ նրա տեղակալ Ալեքսեյ Կոստենկովը ձերբակալվել են կաշառք վերցնելու մեղադրանքով։ «Կոմերսանտ»-ի փոխանցմամբ՝ նրանք գումար են պահանաջել դիվանագիտական կորպուսի գլխավոր վարչության եւ նրա հաճախորդների անվտանգությունն ապահովելու համար։
Պարբերականի տվյալներով՝ գործարար Գլեբ Սնիցերովը դիմել է դաշնային անվտանգության ուժերի վարչություն եւ հայտնել սպաների կաշառք վերցնելու մասին։ Սնիցերովն ասել է, որ առաջին 200 հազարը Կուտերնինին եւ Կոստենիկովին ինքը փոխանցել է անցյալ տարվա հոկտեմբերին, հետո կաշառք տալու մի քանի դեպքեր էլ են եղել։ Ընդհանուր առմամբ, սպաները շուրջ մեկ միլիոն ռուբլի են ստացել։
Կոստենիկովին ձերբակալել են վերջին կաշառքը տալիս։ Նա որոշել է համագործակցել քննչության հետ եւ 200 հազար ռուբլին տարել է պետի աշխատասենյակ։ Իր սեղանին գտնելով փողերը եւ ոստիկանության աշխատակիցներին տեսնելով՝ Կուտերնինը հայտարարել է, որ դա սադրանք է։ Սակայն ռազմական դատարանը նրան չի հավատացել։