Լուսաբացին Իսրայելի ավիացիան Լիբանանի օդային տարածքից Դամասկոսի արվարձանում մի քանի հարված է հասցրել ռազմական օբյեկտներին: Սիրիայի ՀՕՊ-ը հակադարձել է հարվածներին՝ ոչնչացնելով հրթիռների մեծ մասը: Այս մասին հայտնել է Սիրիայի բանակի եւ զինված ուժերի գլխավոր հրամանատարությունը, փոխանցում է ՍԱՆԱ գործակալությունը:
Իսրայելական օդանավերը տեղական ժամանակով 03:42-ին Լիբանանի օդային տարածքից մի քանի հրթիռներ են արձակել: Սիրիական ՀՕՊ-ին հաջողվել է որսալ հրթիռները եւ դրանց մեծ մասը ոչնչացնել: Դամասկոսում հայտարարել են, որ այս ագրեսիայի պատասխանատվությունը Իսրայելն է կրում:
Հունվարի սկզբին Սիրիայի բանակի հրամանատարությունը հայտնել էր, որ Իսրայելի ՌՕՈՒ-ն հրթիռային մի քանի հարվածներ է հասցրել Դամասկոսի արվարձանում գտնվող ռազմական օբյեկտներին: Հրթիռներն օդանավերն արձակել էին Հոլանի բարձունքից եւ Լիբանանի օդային տարածքից: