Սահմանադրական դատարանի դատավորի թեկնածուների վերաբերյալ աշխատանքային խմբի անհատական խորհրդակցական կարծիքները փոխանցվել են հանրապետության նախագահին։ Այս մասին «Փաստինֆո»-ի գրավոր հարցմանն ի պատասխան՝ տեղեկացրին ՀՀ նախագահի աշխատակազմի հասարակայնության հետ կապերի վարչությունից։
Հիշեցնենք, որ Սահմանադրական դատարանի դատավորի թեկնածու առաջադրելու նպատակով Հանրապետության նախագահի՝ 2019 թվականի հունվարի 31-ի ՆԿ-5-Ա կարգադրության համաձայն՝ ձեւավորվել էր հատուկ աշխատանքային խումբ։
Վարչությունից պաշտոնապես հաստատեցին նաեւ, որ Սահմանադրական դատարանի դատավորի թեկնածու առաջադրելու նպատակով Հանրապետության նախագահի աշխատակազմ դիմում է ներկայացրել 3 հավակնորդ՝ Վահե Գրիգորյանը, Գոռ Հովհաննիսյանը և Մարտին Մանուկյանը: Վերոնշյալ կարգադրության համաձայն ձևավորված աշխատանքային խմբի անդամների կողմից թեկնածուի հավակնորդներից Գոռ Հովհաննիսյանի հետ զրույցը տեղի է ունեցել մարտի 6-ին, իսկ մյուս երկու թեկնածուների՝ Վահե Գրիգորյանի և Մարտին Մանուկյանի հետ՝ մարտի 13-ին։
Մեր հարցին, թե նախագահը երբ է ՍԴ դատավորի թեկնածությունը ներկայացնելու ԱԺ, պատասխանեցին, որ օրվա մասին կտեղեկացնեն ավելի ուշ. «Հավակնորդների հետ անձամբ հանդիպելուց հետո այդ հանդիպումների արդյունքներով նախագահը կկայացնի իր որոշումը և համապատասխան թեկնածուին կառաջադրի Ազգային ժողով, որի վերաբերյալ կհրապարակվի լրացուցիչ տեղեկատվություն»:
Նշենք նաեւ, որ «ՍԴ մասին» օրենքի 166-րդ հոդվածը սահմանում է դատավորների ընտրության եւ նշանակման կարգը։ Ըստ դրա՝ Սահմանադրական դատարանի դատավորներին ընտրում է Ազգային ժողովը` պատգամավորների ընդհանուր թվի ձայների առնվազն երեք հինգերորդով եւ տասներկու տարի ժամկետով: Սահմանադրական դատարանը կազմված է ինը դատավորից, որոնցից երեքն ընտրվում են Հանրապետության նախագահի, երեքը՝ Կառավարության, երեքը` դատավորների ընդհանուր ժողովի առաջարկությամբ:
