Ազատության հրապարակը սալիկապատելու գաղափար կա
Կա գաղափար ամբողջ Օպերայի և Ազատության հրապարակի հարակից շրջանում իրականացնել աշխատանքներ՝ գեղարվեստական ձևավորմամբ, դա վերաբերում է նաև Օպերայի շենքին: Կա նաև բուն հրապարակի տարածքը սալիկապատելու գաղափար: Այս մասին լրագրողներին հայտնեց Երևանի քաղաքապետի խոսնակ Հակոբ Կարապետյանը:
Ինչու միանգամից բոլոր սրճարանները չեն ապամոնտաժվում, խոսնակն ասաց. «Հաշվի առնելով մի շարք հանգամանքներ, այդ թվում նաև բիզնեսի վերակազմավորումը, ողջամիտ ժամկետներ տալը, ամբողջն արվում է փուլ առ փուլ: Քաղաքապետն էլ է ասել, որ Օպերայի տարածքի մյուս սրճարաններին էլ է անդրադարձ լինելու:
Այս տարի տարածքը կկանաչապատվի, ոչ առողջ ծառերը կփոխարինվեն նոր տնկիներով, կլինեն սիզամարգեր, թփեր, նախատեսվող մրցույթի արդյունքում հրապարակի եզրի նստարանների ձևավորում կլինի. «Այս տարածքը շատ կարևոր է ամբողջ երկրի համար՝ իր պատմական, մշակութային ժամանցի առումով: Այստեղ այս տարի կունենանք կանաչ տարածք, իսկ հետո՝ բոլորովին այլ տեսք»:
Կարապետյանը ժամկետ չնշեց, ասաց՝ ամեն ինչ լինելու է ողջամիտ ժամկետում և իրավական հարթության մեջ:
