«Ալո, Նիկոլ Փաշինյանն է խոսում» կամ ինչպես են ռուս պրանկերները կատակել Բրիտանիայի ԱԳ նախարարի հետ (ԱՈՒԴԻՈ)

ԵՐԵՎԱՆ, 24 մայիսի./Նովոստի–Արմենիա/. Ռուս պրանկերներ Վովանը և Լեքսուսը (Վլադիմիր Կուզնեցով ու Ալեքսեյ Ստոլյարով) պրանկ են իրականացրել Մեծ Բրիտանիայի ԱԳ ղեկավար Բորիս Ջոնսոնի նկատմամբ` զանգահարելով նրան Հայաստանի վարչապետ Նիկոլ Փաշինյանի անունից: Այդ մասին հայտնում է The Guardian–ը։

Պրանկերները հրապարակել են 18 րոպե տևած հեռախոսազրույցի ձայնագրությունը։ Լսվում է, որ որպես Փաշինյան ներկայացածը խոսում է անգլերեն ռուսական ակցենտով։

Արտաքին գործերի և Համագործակցության գործերով նախարարությունը հաստատել է, որ զանգին պատասխանել է Ջոնսոնը։

Նրանք Ջոնսոնի հետ քննարկել են Ռուսաստանի մեղսակցությունը ՌԴ ԳՀՎ նախկին գնդապետ Սերգեյ Սկրիպալի և նրա դստեր թունավորմանը, լրագրող Քսենիա Սոբչակի այցը Լոնդոն, Ռուսաստանի հետ ՀՀ հարաբերություններին վերաբերող հարցեր, գրում է Daily Storm-ը:

«Մենք կշարունակենք ուժեղացնել ճնշումը որոշ օլիգարխների նկատմամբ, ովքեր շչջապատում են Պուտինին»,– ասել է Ջոնսոնն այն մարդուն, ով ներկայացել է որպես Հայաստանի վարչապետ։

Զրույցի սկզբում արտգործնախարարն ուրախությամբ պատասխանել է իր զրուցակցին Հայաստանի վարչապետի պաշտոնում նշանակվելու կապակցությամբ։ Բայց երբ նրանից պահանջել են հայտնել, արդյո՞ք ինքը վստահ է, որ Սոլսբերիի գորհի հարցում Ռուսաստանի «մատը խառն է», ասել է` «մենք գրեթե 100 տոկոսով վստահ ենք» և առաջարկել ներկայացնել հանրությունից գաղտնի պահվող տեղեկություններ։

Զրույցի զարգացմանը զուգահեռ Ջոնսոնը, հավանաբար, հասկացել է, որ հեռախոսագծի մյուս կողմի ձայնը չի պատկանում Փաշինյանին, և զանգն ընդհատվել է բրիտանական կողմից։

«Փաշինյանի հետ խոսակցությունը, հավանաբար, հետաքրքրել է Ջոնսոնին: ՀՀ վարչապետը հիմա թրենդում է՝ նրան հատկապես եվրոպական երկրներում են սիրում: Մենք չենք փորձել նմանակել Փաշինյանին, խոսել ենք, ինչպես միշտ»,-ասել է Լեքսուսը: -0-