Արմավիրի մարզի խաղողագործներն այսօր առավոտից փակել էին Երևան-Արմավիր ավտոճանապարհը։ Պահանջը մեկն է՝ բարձրացնել խաղողի մթերման գինը։ Արմավիրցիներն աշխատում են Պռոշյանի կոնյակի գործարանի հետ։ Գործարանը արդեն մի քանի օր է՝ խաղողը մթերում է 140 դրամով, նախկին 160-ի փոխարեն։ Այս տարի Արմավիրի մարզում կարկուտի հետևանքով գյուղացիներից շատերի բերքը 100 տոկոսով փչացել էր, անգամ մթերման ենթակա չէ։
Խնդիրն «Առաջին լրատվական»-ը մշտապես բարձրաձայնել է։ Բացի բնական աղետից՝ արմավիրցիներն ունեն նաև ոռոգման ջրի խնդիր, իսկ խաղողը շատ ջուր պահանջող միրգ է, առանց որի կարելի է մոռանալ որակյալ ու համեղ խաղող ունենալու մասին։ Այս բոլոր գործոնները հաշվի առնելով հանդերձ՝ խաղողի մթերման գինը հասցնել 140-ի, գյուղացիների խոսքով, անթույլատրելի է։
Արմավիրի փոխմարզպետ Գագիկ Գաբրիելյանը «Առաջին լրատվական»-ին տեղեկացրեց, որ մթերող ընկերությունները նվազեցրել են խաղողի մթերման 1 կիլոգրամի գինը։ Գյուղացիները պայմանագրեր են կնքել հիմնականում Պռոշյանի կոնյակի գործարանի հետ։
Ի դեպ՝ նշենք, որ «Պեռնո Ռիկար Արմենիա» ընկերությունն, ի դեմս ֆրանսիացիների՝ պահանջել են նվազեցնել խաղողի մթերման ինքնարժեքը, հետևաբար մյուս մասնավոր ընկերությունները չեն կարող 140-ից բարձր գնող խաղող գնել։
Փորձեցինք կապ հաստատել «Պեռնո Ռիկար Արմենիա» ընկերության հետ, սակայն ապարդյուն՝ հեռախոսազանգերը մնացին անպատասխան։