Դաժան ծեծի հետևանքով մահացած Ջուլիետա Ղուկասյանի իրավահաջորդի շահերի ներկայացուցիչները Քննչական կոմիտեի Շիրակի մարզային քննչական վարչությանը ռուսական 102-րդ ռազմաբազայի պայմանագրային զինծառայող Անդրեյ Ռազգիլդեևին ռազմաբազայից Հայաստանի համապատասխան քրեակատարողական հիմնարկ տեղափոխելու միջնորդություն են ներկայացրել:
Թեև միջնորդությունը ներկայացվել է դեկտեմբերի 21-ին, սակայն մինչ օրս դրա վերաբերյալ որոշում չի կայացվել:
Հայաստանի գլխավոր դատախազ Արթուր Դավթյանը, հղում անելով հայ-ռուսական միջպետական պայմանագրին, պարզաբանել էր, թե ինչու է գյումրեցի կնոջ մահվան գործով կասկածվող Անդրեյ Ռազգիլդեևը պահվում ռազմաբազայում:
Տուժողի իրավահաջորդի ներկայացուցիչ Արթուր Սաքունցը ևս հղում է անում այդ նույն հայ-ռուսական միջպետական պայմանագրին ու պնդում, որ ռուս զինծառայողը չի կարող պահվել ռազմաբազայի տարածքում․ - «Հայաստանի Հանրապետության և Ռուսաստանի Դաշնության միջև Հայաստանի Հանրապետության տարածքում ռուսաստանյան ռազմական բազայի գտնվելու հետ կապված գործերով իրավասության և փոխադարձ օգնության վերաբերյալ 1997 թվականի օգոստոսի 25-ին կնքված համաձայնագիրը, որի 4-րդ հոդվածի համաձայն՝ ռուսաստանյան ռազմական բազայի կազմի մեջ մտնող անձանց և այդ անձանց ընտանիքների անդամների կողմից Հայաստանի Հանրապետության տարածքում կատարված հանցագործությունների և այլ իրավախախտումների վերաբերյալ գործերով կիրառվում է Հայաստանի Հանրապետության օրենսդրությունը և գործում են նրա իրավասու մարմինները»: Այսինքն, ըստ Սաքունցի, «այս համաձայնագրով ամրագրվում է, նախ, որ ռուսական բազան գտնվում է ՀՀ տարածքում, և ռուսական բազայի զբաղեցրած տարածքը ՀՀ տարածքն է, որի վրա տարածվում է Հայաստանի Հանրապետության օրենսդրությունը»:
«Այսինքն՝ հակասությո՞ւն կա հայ ռուսական միջպետական պայմանագրում», - այս հարցին Արթուր Սաքունցը արձագանքեց․ - «Դատախազի մեկնաբանությունները չեն համապատասխանում այդ համաձայնագրին և չեն համապատասխանում Հայաստանի Հանրապետության օրենսդրությամբ ամրագրված նորմերին»:
Եթե ռուս զինծառայողին Հայաստանի քրեակատարողական հիմնարկ տեղափոխելու միջնորդությունը մերժի վարույթն իրականացնող մարմինը, տուժողի իրավահաջորդի ներկայացուցիչները պատրաստվում են բողոքարկել:
Արթուր Սաքունցից նաև հետաքրքրվեցինք՝ կարողացե՞լ են պարզել, թե ռուս զինծառայողը առավոտյան ժամը 7-ին Գյումրիում ազատ տեղաշարժի իրավունք ունեցե՞լ է, թե՞՝ ոչ: Պարզվում է՝ Ռազգիլդեևը վարձով է բնակվում Գյումրիում: «Գտնվել է ռուսական ռազմական բազայի տարածքից դուրս, գործողությունը կատարել է ոչ թե ռուսական բազայից դուրս գալուց հետո, այլ ռուսական բազայի տարածքից դուրս գտնված բնակարանից դուրս գալուց հետո», - ասաց տուժողի իրավահաջորդի ներկայացուցիչը:
57-ամյա Ջուլիետա Ղուկասյանը մահացել է անցած տարվա դեկտեմբերի 2-ին Գյումրիի Սլաբոտկա թաղամասում դաժան ծեծի հետևանքով: Դեպքի առթիվ հարուցվել է քրեական գործ դիտավորությամբ առողջությանը ծանր վնասվածք պատճառելու հոդվածով, որն անզգուշությամբ առաջացրել է տուժողի մահը: 23-ամյա ռուս զինծառայողը ձերբակալվել է դեկտեմբերի 10-ին՝ դեպքից 8 օր անց միայն, նրան մեղադրանք է առաջադրվել: