Հունվարի 14-ից իր աշխատանքները սկսեց մեր նորընտիր Ազգային ժողովը։ Նկատի ունենալով այն, որ խորհրդարանի 70 տոկոսը ներկայացնում է քաղաքական մի թիմ, և միայն 30 տոկոսն է ընդդիմություն, Ազգային ժողովի այսպիսի կազմն անհանգստացնող չի՞ արդյոք «Առաջին լրատվական»-ի հարցին «Քաղաքացու որոշում» սոցիալ-դեմոկրատական կուսակցության գործադիր մարմնի քարտուղար Սուրեն Սահակյանը պատասխանեց․ «Կազմի հետ կապված հարցից դա մի քիչ դուրս է, դա խոսում է սահմանադրական անկատար մեխանիզմների մասին, այսինքն՝ հակակշիռների ու փոխզսպումների մասին է խոսքը։ Ըստ Սահմանադրության՝ մի ուժ եթե ընտրություններում բացարձակ մեծամասնություն չստանա, բայց ընտրություններին մասնակցող ուժերից առավելագույն ձայնը ստանա, կարող է ձևավորել Ազգային ժողովը, կառավարությունը, վերահսկում է դատական համակարգը, դատախազ է նշանակում, իրավապահ մարմինների ղեկավարներ է նշանակում։ Այսինքն՝ ստանում է բոլոր լծակները, ու այստեղ շատ աննշան է տիտուլային ընդդիմության դերը, եթե նա մեծամասնություն չձևավորի։ Դրա համար մենք պետք է սահմանադրական նոր հարաբերությունների գործընթաց սկսենք, որովհետև հին Սահմանադրությունը օրենսդրական, իրավական հիմքի վրա էր դրել առկա արատավոր պրակտիկաները։ Մենք պետք է այն փոխենք։ Հակառակ պարագայում, հեղափոխությունը կամ այդ գործընթացները, որոնք հեղափոխական էին իրենց էությամբ, անիմաստ են դառնում»։
«Ես կարծում եմ, որ «Իմ քայլը» դաշինքի անդամներն իրար հետ կապված են մի առաջնորդի միջոցով։ Իհարկե, կան որոշակի խմբեր, և դեռ կձևավորվեն առանձին խմբեր, որոնք ներսում կփորձեն հակադրվել իրար, բայց դա ինչով է կավարտվի կամ ինչ դրական արդյունք կտա, ինձ համար անհասկանալի է։ Ծանոթ լինելով Ազգային ժողովում ներկայացված ուժերի գաղափարախոսությանը, ինձ թվում է, որ ապաքաղաքական Ազգային ժողով է լինելու»,- եզրափակեց մեր բանախոսը։
Մանրամասները՝ տեսանյութում։