Նոր հնարավարություններ հայկական ստարտափերի համար. Մեկնարկում է համաֆինանսավորվող դրամաշնորհների մրցույթի երկրորդ փուլը
Հայաստանում մեկնարկել է նորարարությանն ուղղված համաֆինանսավորվող դրամաշնորհների մրցույթի երկրորդ փուլը, որն ուղղված է տեխնոլոգիական ուղղվածությամբ ստարտափերի և գործող ընկերությունների զարգացմանը:
Մրցույթն իրականացվում է Եվրոպական միության ԵՄ-ն՝ բիզնեսի համար նախաձեռնության շրջանակում գործող Աջակցություն ՓՄՁ զարգացմանը Հայաստանում» ծրագրի կողմից՝ Ձեռնարկությունների ինկուբատոր հիմնադրամի (ՁԻՀ) հետ համատեղ:
Մրցույթին կարող են մասնակցել այն ընկերությունները և թիմերը, որոնք ունեն տեխնոլոգիական ուղղվածություն և համապատասխան փորձ, օրինակ` ճարտարագիտության, մաքուր տեխնոլոգիաների, կենսատեխնոլոգիաների, ինչպես նաև ՏՀՏ-ի առաջատար ոլորտներում (օրինակ՝արհեստական ինտելեկտ, բլոքչեյն և այլն)։ Հայտատուները պարտավոր են ծրագրի համար անհրաժեշտ չափով համաֆինանսավորում ապահովել. Երևանի դեպքում՝ 50 տոկոսի (այսինքն՝մինչև 35,000 եվրո), իսկ մարզերի դեպքում՝ 15 տոկոսի չափով։
Նշենք, որ մրցույթի առաջին փուլը մեկնարկել է 2018 թվականի հունվարին, որի շրջանակում 9 ընկերության ֆինանսավորում է տրամադրվել։
«Ձեռնարկությունների ինկուբատոր» հիմնադրամի տնօրեն Բագրատ Ենգիբարյանը այսօր լրագրողների հետ հանդիպման ժամանակ նշեց, որ այս ծրագիրը բավական հաջող է ընթանում և այլ ծրագրերից տարբերվում է նրանով, որ հատուկ շեշտադրում են անում ճարտարագիտության և բարձր տեխնոլոգիաների ոլորտներին:
Բագրատ Ենգիբարյանն ասաց, որ ծրագրերը պետք է լինեն բարձր տեխնոլոգիաների, ճարտարագիտության, տեղեկատվական տեխնոլոգիաների որոշ ոլորտներից՝ մեքենայական ուսուցում, արհեստական ինտելեկտ և այլն: «Այսինքն, պարզ լուծումներով ծրագրերը, այդ թվում ՝ վեբ, մոբայլ չեն կարող մասնակցել»,- նշեց նա:
Հարցին, թե միայն գաղափար ունենալը բավարա՞ր է մրցույթին մասնակցելու համար, Բագրատ Ենգիբարյանն հայտնեց, որ լավ գաղափարը բավարար չէ: «Պետք է լինի գաղափար, որն արդեն կյանքի է կոչվել, իսկ հիմա խնդիր ունեն դա լրամշակելու կամ շուկա տանելու: Այսինքն՝պետք է ունենալ որոշակի պրոդուկտ, մշակում, և դա է պատճառը, որ խնդրում ենք համաֆինանսավորում, որը նաև բարձրացնում է պատասխանատվությունը»,- ասաց «Ձեռնարկությունների ինկուբատոր» հիմնադրամի տնօրենը:
Նա միաժամանակ ասաց, որ գաղափարների մրցույթը կհայտարարվի մեկ ամսից, իսկ ֆինանսավորումը կլինի 15 հազար եվրոյին համարժեք և անհրաժեշտ չի լինի համաֆինանսավորում:
ՀՀ տրանսպորտի, կապի և տեղեկատվական տեխնոլոգիաների փոխնախարար Ամալյա Եղոյանը ևս կարևորեց դրամաշնորհային ծրագրերի իրականացումը, քանի որ դրանք, ըստ նրա, սկսնակ ընկերություններին հնարավորություն են տալիս կայանալ և նոր շուկաներ ձեռք բերել: «Առաջին փուլում մարզերում ձևավորվել են մի շարք ընկերություններ: Հույս ունենք, որ երկրորդ փուլին ևս մեծ թվով ընկերություններ կմասնակցեն: Այսօր կառավարությունը քննարկում է, թե ինչպես անեն, որ դրամաշնորհների աջակցությամբ ձևավորված սկսնակ ընկերությունները նաև կայուն զարգացման հնարավորություն ստանան և ոչ միայն գործեն տեղական շուկայում, այլև իրենց լուծումները արտահանեն միջազգային շուկաներ»,- նշեց Ամալյա Եղոյանը:
Հայաստանում ԵՄ պատվիրակության միջազգային համագործակցության պատասխանատու Ստանիսլավ Տոշկովն էլ ասաց, որ տնտեսական զարգացումը հանդիսանում է ԵՄ-ի կողմից ցուցաբերվող օժանդակության հիմնական հենասյունը Հայաստանում:
«Կարծում ենք, որ փոքր ու միջին ձեռներեցությունը հանդիսանում են տնտեսության հիմքը: ԵՄ-ն պատրաստ է և կանգնած է փոքր ու միջին ձեռներեցների կողքին, որոնք կարող են արժեք բերել տնտեսությանը»,- ասաց Ստանիսլավ Տոշկովը՝ հավելելով, որ ՓՄՁ-ներին աջակցում են «ԵՄ-ն բիզնեսի համար» և «ԵՄ-ն նորարարության համար» ծրագրերի շրջանակում, սակայն հիմնականը «Աջակցություն ՓՄՁ զարգացման» ծրագիրն է, որն իրականացվում է Գերմանիայի միջազգային համագործակցության ընկերության (GIZ) կողմից:
Այս ծրագրի միջոցով, ըստ նրա, ցանկանում են տեսնել ավելի բարելավված, առաջընթաց գրանցած ընկերություններ:
Խոսելով համաֆինանսավորվող դրամաշնորհների մրցույթի երկրորդ փուլի մասին, Ստանիսլավ Տոշկովը նշեց, որ շատ կարևոր է նորարարական ընկերությունների համար ֆինանսների մատչելիությունը, ուստի ստարտափերի խնդիրների լուծմանն ուղղված դրամաշնորհներ են տրամադրվում: «Կարևոր է, որ այս նորարար ՓՄՁ-ները, որոնք հետաքրքիր գաղափարներ ունեն, աջակցություն ստանան, քանի որ դրանք հանդիսանում են տնտեսության շարժիչ ուժը»,- ասաց նա:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին